Sakhua leh hnam tana pawimawh buaipuitute nuihzat an awm hi a pawi - CYMA President

1st December, 2023

Central YMA president Lalhmachhuana chuan, Mizote sakhua leh hnam tana pawimawh tlawmngai pawlin an buaipui laia lo nuihzat pawl an awm chu pawi a tih thu a sawi.

CYMA President hian nimin khan Zawlbuk Group YMA Sports Meet khârna Thingsulthliah khelmuala a hmanpuinaah thu sawiin, a ṭul anga hma an lak zel dawn thu a sawi a, "NGOCC meeting-te pawh kan nei dawn a, kan meeting thuchhuak lo ngaichâng turin YMA member-te kan inngen a ni. Tunlaiah kan sakhua leh kan hnam tana pawimawh NGO-in a buaipui laiin hnam tan a pawimawh ti lo leh kan hnam tana theihtawp chhuahtute nuihzat pawl kan awm hi a zahthlak a ni. A hunah chuan kan ṭanrual zel a ngai," a ti.

Lalhmachhuana chuan, NGO Coordination Committee-te'n vote chhiar ní sawn tura ECI an ngen chungchang sawiin, "ECI-in Pathianniah vote chhiar hun an titlu a, Mizote tan chuan kan ni serh satliah a ni lo a, Pathian kan biakna ni, ringtute tan chuan kan ni pawimawh ber mai a ni," a ti a, Pathian biakna ni pawimawha vote chhiar tura ruahmanna awm tawh sawn turin ECI an ngen thu a sawi.

CYMA President chuan, Mizoramah YMA hmél thar din an tum dawn tih sawiin, "YMA hmél thar kan hmuh theih nan ṭan kan lak tlân a ngai dawn. YMA awm tawhna hmun apiangah chuan dik lo nia kan hriat chu kan do ngam a ngai. Kan ram leh khawtlang a him theih nan i ṭangrual zel ang u," a ti.

Mizoram chu ram nuam a nih thu sawiin Lalhmachhuana chuan, "A chhunga chêngte pawh inpawh tlang takin kan awm khawm. Mizoram hian venghimtu a mamawh a, vengtu a neih loh chuan a nawmnate, a ralmuannate hi a tlu chhe mai ang tih a hlauhawm," a ti a; Mizoram venghim turin YMA member-te an pawimawh thu a sawi.

CYMA President chuan, YMA member tinin tih tur an neih thu sawiin, "Theihtawp kan chhuah tlan a ngai. Ram leh hnam dinchhuah nan chuan nêk ngai leh ke pên chhuah ngai a awm ṭhin a, theihtawp kan chhuah tlan a ṭul a ni," a ti.

Zawlbuk Group YMA chhungah hian branch 23 a awm a, Sports Meet-ah hian infiamna chi hrang hrang hmangin an inel a ni.