Counting agent-te 7:00 a.m.-ah thlen tur

Aizawl district election officer Nazuk Kumar, bawrhsap hoin nimin khan DC conference hall-ah political party aiawhte'n MLA inthlanpuia vote tlate chhiar chungchang an sawiho. Counting agent-te chu vote chhiar ni zing dar 7-ah vote chhiarna hmuna thleng vek tura beisei an ni tih an sawi.

Election Commission of India ruahman angin, vote tlate chu December 3, 2023 (Pathianni) zing dar 8-ah chhiar ṭan tur a ni a; EVM dahna strong room hawn leh vote chhiar zawha strong room khâr a nih laiin political party aiawhte tel tur a ni.

Aizawl district-ah vote chhiarna hmun pathum - DC pisa, Assembly Annexe basement leh Aizawl College-te ruahman a ni a, vote chhiarna hall chhungah mobile phone ken luh phal a ni lo. Venhimna thuah thum dah a ni dawn a, central armed police force, Mizo IR police leh Mizoram police-te an duty ang. Damdawi lam thiamte awm tura ruahman a ni bawk.

DC pisaah hian Aizawl North-II, Aizawl North-III, Aizawl East-I, Aizawl East-II, Aizawl West-I leh Aizawl West-II assembly constituency-a vote tlate chhiar a ni dawn a; Assembly Annexe-ah Tuivawl, Aizawl North-I, Aizawl South-II leh Aizawl South-III bialte chhiar tur niin, GAC-ah Aizawl West-III leh Aizawl South-I constituency-te chhiar a ni ang.