ICFAI-in convocation an hmang

ICFAI University, Mizoram chuan nimin khan an campus-ah Convocation vawi 11-na an hmang a, under graduate leh post graduate zirlai 267 hnenah degree an hlân.

Convocation hi ICFAI University visitor Dr Hari Babu Kambhampati, Governor-in a kaihruai a, Aeronautical Society of India president Dr G Satheesh Reddy khuallian niin, Padma Shree dawngtu KC Runremsangi khualzahawm a ni.

Dr G Satheesh Reddy chuan, khawvelah India ram mithiamte'n science and technology-ah an thawh hlâwk tih a sawi a, "Tun hmain India rama zirlai thiam filawr tak takte USA, Europe leh ram hausa zawkah hna zawngin an chhuak ṭhin. Tunah chuan a inthlak hlawk tawh a, kal chhuak hmasa zawkte pawh India ramah lo kir leh tawh," a ti.

Mithiamten Start Up India hnuaiah awlsam takin bul an ṭan tih sawiin Satheesh Reddy chuan, "Hun rei lo te chhungin cheng vaibelchhe tam tak hû company an ni tawh," a ti a; Make in India hnuaiah ram pawn aṭanga lei leh lak luh ṭhin hmanrua, bungrua leh technology-te siamin hmasawnna an thlen mek thu a sawi.

Aeronautical Society of India President chuan Mizorama ṭhalaite fuihna thu sawiin, "Start Up India leh Make in India hnuaiah hian Mizoramin hlawhtlin theihna a neihte dap chhuakin, hlawhtlinna in chan theih ngei ka ring," a ti.

Governor pawhin thu sawiin, "Zirlai hlawhtlingte hi hma lam hun êng tak leh chona lian zawkte'n an lo hmuak nghal a ni," a ti a; nasa lehzuala ṭan la tur leh ram leh hnam tana thawh hlâwk, khua leh tui ṭha ni turin a fuih.

Dr Hari Babu Kambhampati chuan, ICFAI University-a hmasawnnaahte a lawmpui tih a sawiia; New Education Policy 2020 ruahmanna siam anga chak taka kal turin Vice Chancellor leh thawktute a chah bawk.

ICFAI Chancellor Prof. YR Haragopal Reddy chuan ICFAI University, Mizoramin honorary doctorate degree pek phalna sorkar aṭanga an hmuh thu a puang.

ICFAI University, Mizoramah hian zirlai 601 an awm mek a, MBA, M.Com, MA, MSW, MSc (Geog), BBA, BCA, HT, BA leh B.Com. te zir theih a ni.