DC-in kawng siam mek a enfiah
Lawngtlai bawrhsap Joseph H Lalramsanga leh sorkar official dangte'n nimin khan NH-54 kawngpui zauh leh thawm ṭhat mekah Lawngtlai AOC Veng leh Thingkah inkara hnathawhte an endik.
Kawngpui endiknaah hian Lawngtlai additional DC Abraham Beirazi Khithie leh sorkar official dang te, National Highways and Infrastructure Development Corporation Limited (NHIDCL) General Manager, VC leh YMA hruaitute an tel.
Thingkah leh AOC Veng inkar kawngpui zauh hna ṭan tawh, la zawh si loh vanga tui lâkna chatlak leh kawng khu vanga mipuiin harsatna an tawh dante khawtlang hruauitute'n DC hnenah an lo hlen a; chak leh sâwt zawka hna thawk turin NHIDCL hotute hrilh an ni.
Joseph H Lalramsanga chuan, Krismas a hnaih tawh avangin khawtlang tana harsatna leh buaina thlen thei zawnga hma la lo turin NHIDCL aiawhte a chah a; hna thawh mekte chu vilpui tur leh a ṭul apianga pui turin khawtlang hruaitute a ngen bawk.
Kawng endiknaah hian kawng zauhna tura ram laka zangnadawmna dawng tawh, hna thawhna tur tiṭhuanawp thei zawnga la insaseng lote chu a rang lam a insaseng tura hriattir an ni a; lungawi lohna la neite chu an lungawi lohna kimchang taka thuneitute hnena thlen tura hrilh an ni.