DGP-in Lungleiah thil chi thum a hawng

Director General of Police (DGP) Anil Shukla chuan November 29, Nilaini khan Lunglei Police Station thawm ṭhat leh Lunglei district police leh mipui tana ruahman WhatsApp Chatbot leh Lunglei police official Facebook page thar a hawng.

Anil Shukla chuan, Lunglei PS chu mipuiin tlangnél taka an pan ngam tura inbuatsaih turin police hotute a chah a, "Lunglei hi ruihhlo leh zu laka khawpui fihlim ni tura hmalak a ngai a, VDP nena thawhhona ṭha neiin kan tu leh fate'n ruihhlo laka an fihlim theih nan hmalak a ngai," a ti.

DGP chuan Lunglei district police-te'n harsatna an neihte chu a hriatpui thu a sawi a, sorkar tharah theihtawpa hmalak a nih tur thu a sawi bawk.

Lunglei SP Rahul Alwal pawhin thu sawiin, "A taka hmuh theih changkanna hmunhma ṭha neih kawnga kan hmalaknate leh technology ṭangkai lehzuala hmang tura kan hmalaknate hi Lunglei district police tan hmasawnna a ni a, min hmuhpui tura DGP a lo kal hi kan lawm tak zet a, a kaihhruaina hnuaia changkanna leh hmasawnna kawng nasa lehzuala zawh zel kan tum," a ti.

Inkhawmah hian kumina Lunglei khawpuia zu leh ruihhlo man kawnga thawk ṭha ber Chanmari VDP hnenah lawmman hlan a ni a, Lunglei district police chhunga zu leh ruihhlo man kawnga police thawh hlâwk berte chawimawina pek a ni.

Tarlan danin, ASI Zothansanga, head constatble Vanlal-thuama, constable F Lalhruaitluanga leh head constable Vanlalchhuanga te thawh ṭhat zarah kum 2023 chhungin zu leh ruihhlo kaihhnawih thubuai 11 ziah luh a ni. Zu ûm 218 leh litre 184, beer bûr li leh buhzu litre 30 man a ni a, Rs 4,25,890 hû a ni. Rs 17,84,800 hû heroin gram 472.90 man a ni bawk.

DGP Anil Shukla hian Lunglei SP pisa leh 2nd MAP hmunpui, Luangmualte pawh tlawhin, an hmunhmate a fang kual a, thawktute'n an mamawhte an lo thlen.

WhatsApp Chatbot hi awlsam taka mipuiin police an biakpawh theihna tura Freshworks, Delhi nen ṭang duna siam a ni a; police hnena thu thlen duhte thlen theihna tur a ni.