Vote chhiar turin inbuatsaih mek zel

MLA inthlanpuia vote tlate chhiar turin nimin khan district hrang hrangah inbuatsaihna leh inzirtirna hun hman chhunzawm a ni.

Champhai DC conference hall-ah vote tlate chhiar tura ruat counting supervisor leh counting assistant-te leh, vote chhiar huna vote chhiar enpui tura ruat micro observer-te pualin training buatsaih a ni a; district election officer James Lalrinchhana'n a telpui.

Champhai district-a Assembly constituency pathuma vote tlate chhiar turin counting supervisor leh counting assistant 29 ṭheuh ruat an ni a; micro observer atan sorkar laipui kaihhnawih hna chelhtu mi 36 ruat an ni.

Kolasib district-a MLA bial pathuma vote tlate chhiar tura ruat, counting supervisor-te leh counting assistant-te tan DC conference hall-ah training thawh hnihna buatsaih a ni a, DEO John LT Sanga'n a telpui. Vote chhiar dan kalphung leh vote chhiarnaa hriat tur pawimawhte zirho a ni a, EVM-a vote tla chhiar dan leh form dahkhah dan a taka enchhin a ni.

Mamit DEO VL Remliana hoin a pisaah vote chhiar nía venhimna kalpui dan tur sawiho a ni a, Mamit district-a returning officer, assistant returning officer, SP, additional SP, SDPO bakah, Election official dangte an tel.

Khawzawlah chuan district election officer K Lalrohlua hoin a pisaah vote chhiar nía venhimna kalpui dan tur sawiho a ni a; Khawzawl district-a MLA bial awmchhun, Tuichang constituency-a vote chhiar dan tur inpuahchah lâwkna hnuhnung ber (final rehearsal) neih a ni bawk.

Tuichang biala vote tlate chu Khawzawl DC conference hall-ah chhiar tur a ni a; polling station 28-te tan dawhkan 14 buatsaih niin, round hnihah chhiar zawh tum a ni.