Gender budgeting chungchang zirho

Directorate of Women & Child Development chuan nimin khan Administrative Training Institute auditorium-ah 'Training of trainers on gender budgeting for government officials' an buatsaih a; sorkar department tinah Gender Budget Cell din a nih theih nan hmalak mek a nih thu tarlan a ni.

Zirhona hi Social Welfare, Tribal Affairs, Women & Child Development additional secretary Donnie-i'n a kaihruai a, "Sustainable Development Goals (SDG) 17 zinga pangana chu intluktlanna chungchang (gender equality) a ni a, SDG-in a hmachhawpte zingah kum 2030-ah chuan hnufual bik awm loa intluktlànna neih theihna tura hmalak a ni. Hmeichhia leh mipate intluktlan theih lohna awmte hnawhkhah a nih a, a inchen lote inchentir a lo nih theihna turin gender budgeting a ṭangkai hle," a ti.

Women & Child Development director Zoramthangi Chhangte-in gender budgeting a sawifiah a; sorkar department tinte'n an ngaihthah theih loh tur leh rálbáng bik awm thei lo tura an ṭan tlan a ngaihna chu Gender budgeting a nih thu sawiin, "Gender budgeting atana hma la tur nodal department chu Women & Child Development a ni a, sorkar pawmpuinain Mizoram pum tana nodal officer turin Women & Child Development Director ruat a ni tawh," a ti a; department tina gender budget cell din a nih theih nan chak taka hmalak mek a nih thu a sawi.

Zoramthangi Chhangte chuan, ramin hma a sawn theih nan mipa leh hmeichhia, naupang aṭanga puitling thlengin tlabal bik awm loa an mamawhna zawn ṭheuha tihchak an ngaih thu a sawi a, tichak turin gender budgeting a pawimawh thu a sawi bawk.