KHAWTHLIR

Doctorate hlan

ICFAI University, Mizoram chuan hnam làm leh zai (folk song & dance) huanga thawh hlawh vanga Padma Shree 2022-23 dawngtu KC Runremsangi hnenah nimin khan D.Litt (Honoris Causa) an hlan. ICFAI University aiawhin Governor Dr Hari Babu Kambhampati, visitor leh Aeronautical Society of India Dr G Satheesh Reddy-te'n KC Runremsangi hnenah an hlan a ni.

Biak-in hawng

Dawrpui Presbyterian Kohhran puihnaa sak Saipum Hmarveng Presbyterian Kohhran biak-in thar chu nimin khan Sakawrhmuituai Presbytery moderator Upa VL Tluanga'n a hawng. Biak-in saknaah hian Dawrpui kohhranin cheng nuai 48.46 an séng a, tualchhung kohhranin cheng nuai 1.97 an séng ve bawk.

Assembly hmang

Sports & Youth Services department hnuaia thawkte chuan nimin khan an conference hall-ah Assembly an hmang. District leh office-in harsatna an tawhte leh an mamawhte leh hmalak dante sawiho a ni a, ṭhalaite'n hma an sawnna turah theihtawp chhuah tlang turin infuih tharna hun an hmang bawk.

Mizoram savate

Lalram Thanga leh Lalmalsawma (L)-te lehkhabu buatsaih, Mizoram Savate (Mizoram Birds Illustrated) tih chu nimin khan chief secretary Dr Renu Sharma-i'n Chief Wildlife Warden conference hall, Aizawlah a tlangzarh. Lehkhabuah hian Mizorama sava chi hrang 275 sawifiah a ni a, a lem tarlan zel a ni bawk.

Counselling training

Mizoram Synod hnuaia Family Guidance & Counselling Centre (FGCC) chuan November 15-28, 2023 chhungin Pastoral Care & Counselling Training an buatsaih a, November 28 khan Synod Conference Centre-ah khàrna inkhawm buatsaih a ni. Khàrna inkhawm hi Synod moderator Rev. Dr C Chawnghmingliana'n hmanpuiin, certificate a sem. Tun ṭum Pastoral Care & Counselling Training hi a vawi 31-na a ni a, Mizoram Presbyterian Kohhran pastor 24 bakah, Myanmar aṭangin pastor panga an tel a ni.