Sample latute'n harsatna an tâwk

Integrated Disease Surveillance Programme (IDSP) state nodal officer Dr Pachuau Lalmalsawma chuan, Covid-19 vei leh vei loh endik ngai, swab sample lak tur a pun zel avangin sample latute an buai hle tih a sawi a, "Chutih laiin, sample latute hian harsatna hrang hrang an tâwk a ni," a ti.

Vanglaini palai zawhna chhangin Dr Pachuau Lalmalsawma chuan, swab sample latute zingah Covid-19 vei hmuh chhuahte an awm avangin team pahnih chu an chhuakvâk thei rih lo tih a sawi a, "Sample lâk tur a pung zel si a, a buaithlak khawp mai," tiin, sample la turin a theih ang anga insem darhin theihtawp an chhuah thu a sawi.

Swab sample latute chu thinhrik an nih fo thu sawiin Pachuau Lalmalsawma chuan, "Hmun ṭhenkhatah chuan lo dawngsawngtu pawh an nei lo a, harsa takin sample lâkna tur inte an zawng ṭhin. Veng 

ṭhenkhat chuan an in lama hawte pawh an remti lo ṭan. Sample latute hian theihtawpa fimkhurin hna an thawk tih hriatpui a, an rilru tihnual zawnga ṭawngkam nei lo hrâm turin mipui kan ngen a ni," a ti.

Thu dawn danin, swab sample latu zinga a tam zawk chu contract-a thawk leh volunteer (hlawh nei loa thawk tura inpe)-te an ni a; volunteer-te chuan hlawh nei loin, tlawmngaiin sample lâk hna an thawk. Sample latute chu a khát tâwkin an swab sample endik ṭhin a ni a, an swab test result a chhuah hmaa an awm khawmna hmun tur ngaihtuah mek niin, test-a negative-te chiah chawlh phalsak an ni ang.

Health department hotute chuan, swab sample latute thinhrik leh enhran an hlawh zel a nih chuan sample lak kawngah harsatna an neih an hlau tih an sawi a; Covid-19 vangin thawktu an indaih lo a, hlawh beisei loa thawk tura inpe eng emaw zat an awm avangin thawktu indaih lohna an chhâwk zângkhai thu an sawi bawk.