Hlawh bat ṭhen zat tur la bithliah lo
Covid-19 vanga Mizoram sorkar sum dinhmun ṭha lo tihziaawmna atana sorkar hnathawkte hlawh bat ṭhensak zat tur leh bat hun tur tihfel a la ni lo.
Vanglaini palai zawhna chhangin Finance department hotute chuan, sorkar hnathawkte hlawh batsak zat tur leh bat hun tur an la tihfel loh thu an sawi a, "Hemi chungchang ngaihtuah hian kan la ṭhukhawm lo," an ti.
Finance Secretary kaihhruai Committee of Economy Measure chuan, sum dinhmun ṭha lo tihziaawmna atan sorkar hnathawk hlawh bat ṭhensak a rawt a, chu chu Council of Minister-in May 22, 2020 khan a pawmpui a ni.
Committee of Economy Measure chuan, sorkar hnathawk group A-te hlawh 15%, group B-te 10%, group C leh D-te 5% bat ṭhensak a rawt a; chutih rualin, thla khata Rs. 40,000 hlawh tling lote erawh chu ngaihhnathiam a rawt thung.
Council of Minister chuan Committee rawtna hi pawm nghal vek loin, group D leh a hniam lamte chu ngaihhnathiam turin an rél a; sum dinhmun azira hlawh bat zat tur ruahman turin Finance department an ruat a ni.