Vaivakawn-Chanmari West-Hunthar Pengṭhuamah lei a chêt belh leh
Vaivakawn, Chanmari West leh Hunthar Veng inrina kawngpui péngṭhuam bula November 2019-a lei che tawh chu May 27, Nilaini zan khan a che leh a, a bul hnaia dawr ṭhenkhatte'n bungrua an thiar chhuak.
Lei chêt leh tlakhniamna hmun hi nimin khan chief minister Zoramthanga leh Disaster Management & Rehabilitation (DMR) minister Lalchamliana ten an tlawh a; bialtu MLA, PWD, DMR department hotute'n ṭawiawmin, khawtlang hruaitute nen hmalak dan tur an sawiho. Chief Minister chuan, lei tlahniamin a nghawngte chu a tawrhpui thu leh, tawrhna nasa zawk a thlen loh nan sorkarin hma a lak dawn thu a sawi.
DMR minister Lalchamliana chuan, lei tlahniam thawm ṭhat nan sorkarah sum dil thuai a nih tur thu sawiin, lung phuar khawm (gabion wall) hmangin thawm
ṭhat tum a nih thu a sawi a, "A bul hnaia in ṭhiah ngaite ṭhiatin, inthiar chhuah ngaite inthiar chhuak se. Kimchang zawkin kan la ngaihtuah leh ang," a ti.
Nikum November thlaa a chêt hmasak ṭumin a thawm ṭhatna tur sum sorkar laipui aṭangin cheng vbc. 10.66 hmuh a ni a; lung phuarkhawm hmangin kawngpui tlahniam chu dâwl a ni a, lirthei tlân theiha siam a ni.
Lei tlahniam laia mipui him zawk nan Aizawl Traffic SP Rodingliana Chawngthu chuan lirthei tlân dan tur a ruahman nghal bawk.
Lirthei tlân dan tur
# Hunthar péng leh Chanmari West, Central Road Junction (B Sairengpuii) in bul inkarah two wheeler tih loh lirthei dang tlân tlang phal a ni lo.
# Edenthar Veng aṭangin chho zawngin Chanmari West lamah LMV chin hnuai lam an tlan thei.
# Chanmari West lam aṭanga Sairang, Hunthar Veng, Edenthar Veng lama kal turte chu Vaivakawn kaltlangin Ramrikawn, Sakawrtuichhun lamah emaw, Chanmari West kawipui aṭanga Edenthar veng lam panin Edenthar Veng thlen hmaa MUP Road lamah kalin NH-54 an pawh thei.
# Ṭul bik thilah chuan Chanmari West aṭangin Chanmari West AMC Road/Thlanmual kaltlangin Central Road-ah LMV tan chhuk zawngin NH-54 pawh theih a ni. Kawng a chhuk ulh avangin kawng hmangtute chu fimkhur tura hriattir an ni.
# Vaivakawn leh Edenthar Veng via Hunthar-Chanmari West, etc. inkar kawngpui dungah lirthei leh bungrua dah phal a ni lo.