Inthlan vote chhiar hun sawn phûtin NGO-te’n punkhawm an huaihawt; Vote chhiar hun Dec. 4-ah sawn a ni

NGO Coordination Committee (NGOCC) huaihawtin nimin khan Mizoram hmun hrang hrangah MLA inthlanpuia vote tlate Pathiannia chhiar duh loh lantirna, 'Kristian Ni Serh Humhalhna Punkhawm' huaihawt a ni a, vote chhiar ní atan Pathianni a ruat tawh chu sawn turin Election Commission of India an ngen nawn. ECI chuan vote chhiar hun chu December 4, 2023 (Thawhṭanni)-ah sawn a nih thu nizan khan a puang.

Aizawla punkhawmnaah NGOCC chairman Lalhmachhuana chuan, ECI-in Pathiannia vote chhiar hun a ruat chu kohhran, pawl leh political party-te'n sawn tura ngenna lehkha an thlente chhàn a ni lo tih sawiin, hnam leh sakhaw chungchangah punkhawm a ngai fo chuan Mizote ṭanrualna pe se a duh thu a sawi.

Lalhmachhuana chuan, ECI hotute hmuh tuma appointment an dilnaah Mizoram chief electoral officer Madup Viyas-a'n a ngaihtuahpui duh lo tih sawiin, "Kal tawp rawh u min ti. Vote thlak zawh hnuah vote chhiar ni sawn kan duh thu thlena ECI hotute a zuk hmuh khan eng tin tak nge Mizote aiawh hian a zuk ṭan tâk tih hi kan hre duh a, Mizote aiawhtu hnam dang kan neih hian Mizote aiawhin a ṭang tak zet em tih hi hriat a chakawm khawp mai," a ti.

Kristian ramah Kristiante ni serh humhalh a ngai ta chu lungchhiatthlak a tih thu sawiin Lalhmachhuana chuan, "Pathian a zahawm ka ti khawp mai. Chutih lai meka Pathianni hmuhalh duhna thinlung pawh nei lote an awm tih hriat hian rilru a tina zual. Pathianniah Pathian thu kan zirho ṭhin a, chutiang hlutna pawh hre tawh lo Kristian kan awm nia a langte hi a rapthlak tak zet. Piantharna dik, Pathian hriatnaah hian kan lêt a hun," a ti a; mipui mai ni loin, kohhran hruaitute pawh an inen lêt a ngai tih a sawi.

NGOCC Chairman chuan, Mizoram sorkar hnuaia thawkte chu Mizo hnam leh sakhua dah pawimawh tura chahin, "Hnam dang chuan engti zawng pawhin khu lam aṭanga lo kal chu an lo aw zung zung pawh a ni thei e, Mizo officer i nihna ang khan he ram leh hnam tan hian a theih chin chinah lo dodalin lo ṭang ve zel ang che u," a ti.

Punkhawmah hian Mizoram Kohhran Hruaitute Committee vice president Rev. Zionparmawia, MHIP president Ngurmawii Sailo, MZP president H Lalthianghlima leh MSU president Samuel Zoramthanpuia te pawhin thu an sawi a; resolution pahnih an siam a ni.

RESOLUTION

1. ECI-in Mizoram Assembly inthlanpui 2023 vote chhiar ní atan Kristiante ni serh leh Pathian kan biakna ní, Pathianni (December 3,2023) a ruat hi ṭha lo kan ti a, pawi kan ti tak zet.

2. ECI hian vote chhiar ní atan Pathianni a ruat tawh hi sawn ngei turin vawiina kal khawmte hian kan ngen nawn leh a ni.

Vote chhiar hun sawn a ni

November 7, 2023-a Mizoram Legislative Assembly inthlanpuia vote tlate chu December 3, naktuk Pathianniah chhiar tura ruahman tawh ni mah se, ECI chuan December 4, 2023, Thawhṭanni-ah sawn a ni tih nizan khan a puang.

ECI-in nizana press note a tihchhuahah chuan, Mizoram aṭangin December 3, 2023-a vote chhiar tur ruahman chu sawn a, ni dang ruat tura ngenna eng emaw zat dawn a nih thu a tarlang a; hun sawn an duh chhan pawh Pathianni, Mizoram mipui tana ni pawimawh bik a nih vang a ni tih a tarlang bawk.

ECI chuan, ngenna an dawnte chu ngaihtuah a nih hnuah Mizoram Legislative Assembly inthlanpui vote chhiar hun chu December 4, 2023 (Thawhṭani)-ah sawn a nih thu a puang ta a ni.

Mizoram inthlanpuia Assembly constituency tina vote tlate chu an awmna district ṭheuhah chhiar a ni dawn a; Aizawl district-ah bial 12, Lunglei district-ah bial paruk, Siaha district-ah bial pahnih, Champhai, Kolasib, Serchhip, Lawngtlai, Mamit leh Saitual district-ahte bial pathum ṭheuh leh, Khawzawl leh Hnahthial district-ah bial pakhat ve ve a awm.

District hrang hrangah hian belh­khawmin EVM-a vote tlate chhiarna tur dawhkan (table) 396 leh postal ballot-a vote tlate chhiarna tur table 56 ruahman a ni.

Bial tina vote tlate chu chhiar zat (round) tur a in ang lo a, round hnih aṭanga round nga-ah chhiar zawh a ni ang.

Ruahman dan chuan vote tlate hi round hniha chhiar zawh tur bial khat, round thuma zawh tur bial 20, round lia zawh tur bial 12 leh round ngaa chhiar zawh tur bial pasarih a awm dawn a ni.