World AIDS Day 2023 hman a ni; Mizoramah HIV vei 29,514, thi 4,703

Nimin December 1 kha HIV/AIDS dona ní, World AIDS Day a ni a, Mizoram hmun hrang hrangah hman niin, Aizawlah chuan Vaivakawn YMA Hall-ah hman a ni. Kumin September thla tawp thlengin Mizoramah HIV vei mi 29,514 hmuh chhuah a ni tawh a, mi 4,703 an thi tawh.

MSACS chhinchhiah danin, October 1990 aṭanga September 2023 thleng khan Mizoramah HIV vei mi 29,514 hmuh chhuah a ni tawh a, mi náwlpui (general client) endik aṭanga hmuh mi 27,080 leh nu nau pâi endik aṭanga hmuh mi 2,434 an ni.

September 30, 2023 thlengin HIV vei zinga mi 4,703 an thi tawh a, chu'ngte chu mipa 3,082, hmeichhia 1,541 leh naupang 80 an ni. Anti retroviral therapy (ART) centre-ah HIV vei mi 23,857 an inziak lut tawh a, ART damdawi la tawh mi 21,303 an awm.

MSACS project director Dr Lalthlengliani chuan, HIV vei mekte, damdawi hmanga inchiu ṭhin te, mahni anpui kawp ṭhinte leh hmeichhe inzuar ṭhinte chu World AIDS Day tihlawhtling tura thâ an thawh leh an inpeknaah lawmthu a hrilh a; HIV vei mekte’n enkawlna ṭha an dawn zel theih nan leh HIV darh zel tur vennaah chak zawka ke pênhopuiah a sáwm.

Hunserh hmangtu Rev. Lalsangbera, Synod Family Guidance and Counseling Centre director chuan, HIV leh AIDS natna kai chhanah chhungkaw inenkawlna fuh tâwk loh vang tih chu rilrua lian a nih fo thu a sawi a, "Chhungkaw nuam leh hlim neih hi ngaih pawimawh thar a ṭul a, kan nunah thil ṭha lo tak lo thlengte pawm thiam hmasak hi damna kailàwn hmasa a ni," a ti.

Aizawla World AIDS Day hmannaah hian Positive Women Network of Mizoram president Vanlalruati pawhin thu a sawi a; damdawia inchiu ṭhin leh HIV vei mekte aṭangin an harsatna leh hun tawn dante ngaihthlak a ni a, AIDS vanga thi tawhte hriatrengna leh HIV darh zel tur vênna atana inpek tharna atan bati chhit a ni bawk.

World AIDS Day hi kum 1988 aṭangin December 1-ah hman ṭhin a ni a, World Health Organisation (WHO)-in hriselna lam hawi kum khat chhunga ni bik a puan pariat zinga pakhat a ni.