'Krismas pual thisen pek' hawn a ni

Kumin December thla chhungin Mizorama blood bank hrang hrangah 'Krismas puala thisen pek' huaihawt a ni leh dawn a, nimin khan Civil Hospital, Aizawl Blood Bank-ah National Health Mission (NHM) mission director Dr Eric Zomawia'n a hawng.

Krismas puala thisen pek hawnna inkhawm hi Association for Voluntary Blood Donation (AVBD) president C Lalnunnema'n a kaihruai a; hawngtu Dr Eric Zomawia chuan, AVBD leh an thawhpuite'n Krismas puala thisen pek an huaihawt ṭhin chu damlo, thisen mamawhte tan a hlu tak zet tih sawiin, thisen hmanga mihringte chhandamtu Isua pian lawm nan leh mi dangte nunna chhan nan thisen pe turin Mizo ṭhalaite a sáwm.

Dr Eric Zomawia chuan, thisen pe turin hrisel ṭha, natna hrang hrang laka fihlim nih a ngai tih sawiin, "Thisen pek hi HIV darh zel tur vennaah thil pawimawh tak a ni. Blood donor-te'n kan nun uluk ila, thisen pe zel thei tura inlâk fit a pawimawh hle a ni," a ti a, nun uluk tur leh taksa enkawl ṭha turin mipui a chah.

AVBD president C Lalnunnema chuan, Mizorama hunpui lai, Krismas leh kum thar vuakvetah thisen pe an tlêm deuh ṭhin thu leh, hunpui laiin pawl hrang hrangte an buai a, kum tharah pawl insiamrem lai a nih bawk avangin páwl hminga thisen pe pawh an tlem ṭhin thu a sawi a, "Hengte avang hian kum 2010 aṭang khan Krismas puala thisen pek hi buatsaih ṭhin a ni," a ti.

Krismas puala thisen pek hi AVBD, MSACS, NHM leh blood bank hrang hrangte huaihawt a ni a, hawnna inkhawmah hian Civil Hospital, Aizawl (CHA) medical superintendent Dr Zoramthanga, AVBD hruaitute leh CHA blood bank-a thawkte an tel.

December 2023 chhung zawng Krismas puala thisen pek hi kalpui a ni dawn a, blood bank-ah kalin thisen pek theih a ni a, thisen petute hnenah ei tur tuihnai tak leh thilpek pek zel a ni ang. Nimina a hawn ní-ah hian Mamawii Higher Secondary School NSS-te'n thisen pe nghalin, hmeichhia 18-te'n an pe a ni.