KHAWTHLIR

Tunlaia Aizawla Covid-19 vei hmuh chhuahte'n an kài chhàwn theihte chhuina kal zel chuan Synod Hospital a nghawng tel a; hei vang hian Synod Hospital chuan nimin tlai dar 5 aṭang khan tiam chin awm loin damlo inentir leh damlo admit thar tur reng reng tih theih a ni rih lo tih an puang.

State Referral Hospital (SRH)-ah nimin khan Covid-19 vei mi pathum dah luh thar an ni a, chu'ngte nen chuan SRH-ah hripui vei vangin mi 56 enkawl mek an ni. ICU-ah mi pahnih, SICU-ah mi pathum leh Isolation Ward-ah mi 51 an awm. SRH-ZMC Bulletin tarlan danin, ICU-a awm mekte an ṭha a, ngaihtuahawm an ni lo. SICU-a awmte'n harsatna an nei lo a, ward-a awm zingah khawsik sang vak lo nei pahnih an awm.

Aizawl khawpuiah inkharkhip mek a nih avangin Mizoram Synod chuan Synod Office chu August 20, Ningani thleng khâr rih a nih thu a puang. Inkhàrkhipin a huam chhunga committee hrang hrang 

ṭhutkhawm tura ruahman tawhte pawh ṭhulh a ni.

Aizawl DC chuan nimin khan hriattirna a tichhuak a; Lockdown kaihhruaina no. 2 angin, August 16-21, 2020 chhunga medical emergency leh chhiattawh thila Aizawl khawpuia veivah phalna, Aizawl DC hnena dil turte'n online-in https://curfewpass.ssdd.in/ ah dilna thehluh tur a nih thu a tarlang.

Nimin khan Union minister of Environment, Forest & Climate Change (EFCC) Prakash Javadekar hoin state hrang hrang EFCC minister-te'n video conference an nei a; EFCC minister TJ Lalnuntluanga pawh telin, scheme hrang hrang hnuaia Mizoram sorkar hmalaknate leh Mizoram mamawhte a sawi. Conference-ah hian Nagar Van Scheme, School Nursery Scheme, Plantation Under 20 Points, Afforestation in Catchments of 13 Rivers, LiDAR Survey leh National Transit Permit Portal-te sawiho a ni.