Chanchinbute sum hnár hrêkna tura rawtna paih turin MJA-in CM an ngen
Mizoram Journalists’ Association (MJA) General Headquarters chuan, Mizoram sorkarin sum inrenchemna tura ruahmanna a siam zingah Mizorama chanchinbute ei bél nghawng thei zawnga ruahmanna awm chu paih leh turin nimin khan chief minister Zoramthanga an ngen.
MJA Gen.Hqrs. hruaitute chuan nimin khan CM Zoramthanga chu a pisaah an hmu a; Mizoram sorkarin a din Committee of Economy Measures-in sum renchemna atana rawtna an neihte chu a tlangpuiin MJA-in an thlàwp laiin, rawtna zingah online advertisement leh publicity lam kalpui uar tura rawtna awm tel chu chanchinbute tan chuan an eizawnna tàwp phah theihna a nih avangin paih leh turin an ngen a ni.
MJA hruaitute chuan, coronavirus hripui léng vangin khawvel, India leh Mizoram sorkar buai dan leh harsatna an hriatpui thu sawiin, Mizoram sorkar pawhin a tìra sum ruahmannaa tel lo cheng vaibelchhe tam tak a hmang tih an hriat thu leh, sorkar sum harsatna pawh an hriatthiampui thu CM an hrilh.
CM hnena MJA-in an thlen dan chuan, Mizoram sorkar annual budget-ah department hrang hrangin kum khat chhunga ‘Advertising & publicity' atana sum an dah chu budget pumpui aṭanga chhûtin, zaa pawisa (naia) 10 (0.1%) aiin a sang ngai lo. Kum 2020-21 Mizoram budget (Demands for Grants)-a advertising & publicity atana department 32-a sum an dah belhkhawm chu cheng nuai 214.23 a ni a, chu chu budget pumpui aṭangin zaa paisa 2 (0.02%) vel a ni.
Chanchinbute chu a lâk man (subscribtion fee) aṭang ringawtin an intodelh phâk loh thu sawiin MJA hruaitute chuan, "Mizoram chauh ni lo, national paper-te pawh advertisement tel loa dam khawchhuak thei lo ve tho an ni. Kum tina sorkarin advertising & publicity atana sum beitham tak a dah hi chanchinbute'n nunna hnár atana kan hman ve ṭhin a ni," an ti.
MJA hruaitute hian, sorkar sum renchemna atana rawtna, online advertising leh publicity lam kalpui uar tura tih chu kaltlangpui a nih chuan, chanchinbute'n sorkar aṭangin advertisement an hmu thei dawn lo tih an sawi a, "Advertisement tel lo chuan rei tak kan kal thei dawn lo," tiin, sorkar sum renchemna kalpui tura 'Online advertisement leh publicity uar' tih chu paih leh turin CM an ngen a ni.
CM Zoramthanga chuan, MJA hruaitute thu thlen chu a lo en zui tur thu leh sorkar hotu dangte a lo sawipui tur thu a sawi a; siamṭhat harsa a nih a rin loh thu a lo hrilh.