Aizawl total lockdown kaihhruaina

Mizoram sorkarin Aizawl Municipal Corporation (AMC) huam chhungah August 16, Pathianni zan aṭanga August 21, 2020 zinga dar 4:30 thlenga total lockdown a puan chhunga hman tur inkaihhruaina chu Chief Secretary-in a tichhuak tawh. Inkaihhruaina hian a hmaa lockdown kaihhruaina lo tih­chhuah tawh chu total lockdown chhung bikah chuan a luahlàn ang.

Aizawla ni li chhung inkhàrkhip hi August 16, Pathianni chawhnua Health & Family Welfare minister Dr R Lalthangliana hoa sorkar hotute SAD Conference Hall-ah ṭhukhawmin an rêl a ni. Ṭhutkhawmah hian Home minister Lalchamliana, FCSCA minister K Lalrinliana, IPR minister Lalruatkima, Covid-19 Medical Operational Team chairman Dr ZR Thiamsanga, MLA te, chief secretary Lalnunmawia Chuaungo, Home Secretary leh Health Secretary-te pawh an tel.

Indian Medical Association, Mizoram Govt. Doctors' Association leh Non-Go­vernment Hospital Association aiawh te, sorkar department hrang hranga secretary leh director te, police hotu te, SRH-ZMC hotute an tel bawk.

1.    Lengpui Airport hawn chhunzawm a ni ang. Lengpui Airport aṭanga Mizorama rawn lut turte'n mCOVID-19 mobile application-a mFlight emaw, mcovid19.mizoram.gov.in a mpassFLIGHT hmangin phalna an la hmasa tur a ni.

2.    Páwn lam aṭanga AMC chhunga luh leh Aizawl pawna chhuah (zin veivah) khap a ni. Hei hian Home department-in Mizoram luh phalna a pek te, Mizoram páwna chhuak tur te, damlohna (medical emergency) leh chhiat tawh thila chhungkhat hnai zual (pi leh pu, nu leh pa, tu leh fa leh pianpui unau)-te veivahna a huam lo. Medical emergency leh chhiat tawh thilah chuan Aizawl DC phalna lak tur a ni a, phalna dil dan tur kalphung (online/offline) chu DC-in mipui hriat atan a puangzar ang.

3.    AMC pawn aṭangin ni tin mamawh (essential commodity) chauh lak luh phal a ni. Bungraw châwk luh leh Aizawl aṭang/paltlanga bungrua thiar chungchangah DC-in ruahmanna a siam ang.

4.    AMC area-ah ni tin mamawh zawrhna dawrte chu DC leh LTF-te ruahmanna siam angin hawn theih a ni ang. Dawrkaite'n hand sanitizer, anmahni dawrtute hman tur dahin social distancing an zâwm ṭha tur a ni. Anmahni dawrtute hming, veng, phone number leh an dàwr hun ziahna register siamin an ziak lut vek tur a ni.

5.    Essential commodity dàwr hawn phalsakte hi (damdawi dawr tiam loin) tlai dar 5-ah khâr vek tur.

6.    Zirna in, training institute leh sakhaw biakna hmunte khâr chhunzawm zel a ni ang. AMC chhunga undergraduate leh postgraduate examination (offline)-te pawh ṭhulh rih a ni ang a, online examination kalpui a ni ang.

7.    Mitthi vuinaah mi 50 aia tam punkhawm khap a ni. Mitthi vui chungchangah chhiatni/ṭhatni chungchanga order August 13, 2020-a chhuah khauh taka kenkawh tur a ni.

8.    Páwn (dawr/office/damdawi-in/van­tlang hmun)-a chhuak tur reng rengin hmai an tuam ngei tur a ni.

9.    Aizawla chengte phalna nei loin mahni in leh compound chhuahsan phal a ni lo.

10.    Total lockdown-in a huam lohte

i)    Health department, Home department, Police, Home Guards & Civil Defence, Fire & Emergency Services, Prisons, DMR, FCSCA, Civil Aviation, Excise & Narcotics, State Election Commission, VC/LC inthlan kaihhnawih office-a thawkte leh PWD/PHE/P&E department-a essential service bik thawkte (an kal lam leh haw lam)

ii)    Covid-10 duty sorkar hnathawk a chunga tarlan telh lohte leh local task force member leh volunteer-te

iii)    Medical & veterinary emergency duty-te leh damdawi-ina thawk

iv)    Mizoram Kohhran Hruaitute Committee member-te

v)    Bank, ATM, Postal, Telecom service provider leh FCI-a thawk

vi)    Print & electronic media, cable leh internet service-a thawk

vii)    Bawnghnute sem leh bawlhhlawh paih hna thawktute

viii)    Petrol pump leh LPG sem hna thawktute

ix)    Courier, home delivery leh e-commerce service

x)    Private security service

xi)    Airport aṭanga thlawhnaa lo haw qua­rantine tur buaipuitute

xii)    Mizoram University hnuaia post gra­duate online exam buaipuitu faculty-te

    (Heng mite hian photo identity card an keng ngei tur a ni)

Thupek zâwm lote chu Disaster Ma­nagement Act, 2005 Section 51-60 te, The Mizoram (Containment & Prevention of Covid-19) Ordinance, 2020 Section 5 leh, IPC Section 188 hmangin hrem theih a ni.