KHAWTHLIR

Kolasib Border Safety Monitoring Team leh Kolasib Diakkawn Task Force-te ruahman anga Phaisen khuaa ramri depa duty tur Diakkawn Branch YMA member 45-te chu nimin khan Kolasib DC Dr H Lalthlangliana'n a vai liam. Duty turte hian anmahni ei leh in tur leh an kalna lirthei an intum vek a, June 3, 2020 zing dar 6 thleng an duty ang.

Lunglei North bialtu MLA Dr Vanlalṭanpuia chuan nimin khan a bial chhunga Rawpui chu an tui tlan ber a kang thut avanga harsatna an tawh chungchang enin a tlawh a, khawtlang hruaitute nen harsatna sutkian dan tur an sawiho a; Pangzawl leh Thiltlangte a tlawh bawk. MLA hian inkhàrkhip chhunga chhuanchham an awm palha harsatna phuhrûk nan MNF unit-te hnenah buhfai ṭhahnem tak a hlàn.

Nimin chhun khan West Phaileng Electric Vengah Simona in chu an kawmchhak lama leiminin a hnâwl. Thu dawn danin, leiminin in a hnâwl lai hian in chhungah nu ber leh an fate pahnih an awm a, an pathumin an hliam a; W Phaileng damdawi-inah hruai an ni a, ngaihtuahawm erawh an ni lo. 

Chief secretary Lalnunmawia Chuaungo chuan, Mizorama bungraw thiartu lirthei driver leh handyman-te chu an mobile phone-ah 'Aarogya Setu' application dah (install) vek turin a hriattir. Hei hi Covid-19 veia rinhlelhte hriat chhuaha chhui zung zung theih nana tih a ni.

Vanglaini semtu Lalrammuanpuia (32), Sialhawk chu nimin zing dar 1:30 khan Aizawl Civil Hospital-ah a thi a, a ruang hi Sialhawk panpui nghal a ni. Amah leh a chhungte mi pangain Vanglaini an sem mek a, ruang zuia an kal vek avangin heng - Tuikhuahtlang, Khatla, Dawrpui Vengthar, Dinthar, Tuikual, New Capital Complex, Treasury Square chhevel, Venghlui, Mission Veng, Tuikual South leh Tuikual North-ahte hian hun eng emaw chen chu Vanglaini sem theih a ni lo ang.