Vawiinah vote chhiar dawn

November 7, 2023-a Mizoram Legislative Assembly inthlanpuia vote tlate chu vawiin hian chhiar a ni dawn. Vote chhiar hi zing dar 8-ah ṭan a ni dawn. Zing dar 8-ah postal ballot-te chhiar an ni ang a, dar 8:30-ah electronic voting machine-a vote tlate chhiar ṭan a ni ang.

Assembly consti-tuency tina vote tlate chu an awmna district ṭheuhah chhiar a ni dawn a, Aizawl district-ah bial 12, Lunglei district-ah bial paruk, Siaha district-ah bial pahnih, Champhai, Kolasib, Serchhip, Lawngtlai, Mamit leh Saitual district-ahte bial pathum ṭheuh leh, Khawzawl leh Hnahthial district-ah bial pakhat ve ve a awm.

Assembly bial tina vote tlate chhiar zat (round) tur a inang lo a, round hnih aṭanga round ngaah chhiar zawh a ni dawn. MLA atana thlan tlinte hnenah certificate hlan nghal zel a ni ang.

Mizoram Legislative Assembly General Election-a vote chhiartu turte duty-na hmun tur khawl hmanga ruatna second randomisation chu district hrang hrangah neih zawh a ni a; tukin zing dar 5-ah khan final randomisation neih a ni.

District hrang hrangah hian belhkhawmin polling station 1,276-ah vote thlak a ni a; EVM-a vote tlate chhiarna tur dawhkan (table) 396 leh postal ballot-a vote tlate chhiarna tur table 56 ruahman a ni.