ECI-in vote chhiar ni a sawn vangin Joint NGO-in lawmthu an sawi

NGO Coordination Committee (NGOCC) chuan Mizoram inthlanpuia vote tlate chhiar ní sawn tura Election Commission of India (ECI) an nawrna a hlawhtling chu lawmawm an tih thu leh mipui thlàwpnaah an lawm thu an sawi.

NGOCC hruaitute chuan December 2, Inrinni khan CYMA Committee Room-ah thuthar thehdarhtute an kâwm a; chairman Lalhmachhuana chuan, vote chhiar ni sawn tura an nawrnaah Mizo mipuiin an thlàwpna chu ropui an tih thu sawiin, "Hma kan laknaah hian mihring ang chuan kan theihna leh chakna zawng zawng chuan ke kan pên a, MKHC kaltlangin kohhran hrang hrang leh mimalte'n min ṭawngṭaipui a, tlai ngai lo Pathian hian a hun takah ro a rawn rel ta a ni," a ti a; beiseina an neih mang tawh loh hnua hlawhtlinna an hmu chu Pathian vang a nih thu a sawi.

Lalhmachhuana chuan, ECI hotute hnena vote chhiar ni sawn tura an rawtnaah Inrinni leh Pathianni chu Mizorama kohhran hrang hrangte tan ni pawimawh a nih avangin, he'ng ni-ahte hian ruat lo tura an thlen thu a sawi a, "Manipur-a kan Zo hnahthlak Pu Luna, Rajya Sabha deputy secretary ni mek chuan ECI hotute hmu tura appoinment kan hmuh theih nan theihtawp min chhuahpui a, ECI hotute kan hmuhnaah pawh a rawn kal ve," a ti.

Delhi-a an chàm chhungin Manipur-a Zo hnahthlak harsatna tawkte leh Rajya Sabha MP K Vanlalvena hmalaknain Union Minority minister John Barla an kawm thu sawiin Lalhmachuana chuan, John Barla chuan CYMA hnenah vantlang tana hna an thawh nasat avangin January 2024 ral hmain ambulance pek a lo tiam tih a sawi.

NGOCC hian December 2, Inrinni khan ECI-in inthlan vote chhiar ni a sawn chungchangah lawmthu sawina thuchhuah an tichhuak a, "Mizo mipuite'n nasa takin kan duh loh thu leh ni danga sawn tura kan duh thu kan puang chhuak a, hetianga Kristian-te'n kan ni serh humhalhna tura theihtawp kan chhuahnate ECI-in min zahsak a, vote chhiar hun December 4, 2023-a a sawn ta hi lawmawm kan ti tak zet a ni," an ti.

Vote chhiar hun sawn tuar an beihnaah Mizo mipuite chungah leh theihtawp chhuahtu pawl hrang hrang leh political party-te chungah an lawm thu tarlangin NGOCC chuan, "Hun lo kal zel turah pawh kan ram leh hnam, kan sakhua a him zel theihna tura ṭangrual zel turin kan insáwm a ni," an ti bawk.