Kolasib & Mamit-ah World AIDS Day

December 2, Inrinni khan Kolasib leh Mamit district-ah World AIDS Day (December 1) pualin hun hman a ni a; sorkar kum kal mekah April-October chhungin Kolasib district-ah HIV vei mi 86 hmuh chhuah a nih thu tarlan a ni.

World AIDS Day hi Kolasib Venglai YMA Park-ah Mizoram State AIDS Control Society (MSACS) leh Kolasib District AIDS Prevention & Control Committee (DAPCC) bultumin hman a ni a, Kolasib chief medical officer Dr RK Lalthlamuana'n a hmanpui.

Dr RK Lalthlamuana chuan, Kolasib district-a HIV kaina tam ber chu mipat hmeichhiatna hman khawlohna leh ruihhlo ngaite'n hriau thianghlim lo an inhman ṭâwm aṭangin a nih thu a sawi a, "HIV kan kai theihna sang ber chu kan hriat chiante leh kan bul hnaia mite aṭangin a nih avangin kan fimkhur a ṭul," a ti.

Report-a a lan danin, April-October, 2023 chhungin Kolasib district-ah mi náwlpui endik 3,435 aṭangin HIV vei mi 75 hmuh chhuah a ni a, nau pai 1,195 endik zinga 11-in HIV an vei. Belh khawmin mi 4,630 endik zingah HIV vei mi 86 an awm a ni.

Kolasib district-a damdawia inchiu ṭhin chhinchhiah mi 1,293 zingah HIV vei 387 an awm a, nawhchizuar (female sex worker) 153 chhinchhiah niin, an zingah HIV+ve 16 an awm. Mipa anpui kawp ṭhin chhinchhiah mi 25 zinga panga chuan HIV an vei mek bawk.

Kolasib district-ah hian thisen endikna hmun, Integrated Counselling & Testing Centre pathum leh Facility-Integrated Counselling & Testing Centre paruk a awm. OST Centre pahnih leh Satellite OST panga a awm a, chu'ng centre-ahte chuan OST client 261 an awm mek a; Kolasib district-a HIV vei mi 1,255 zinga 1,245-in ART damdawi an ei mek.

Mamit Bazarah pawh District AIDS Prevention & Control Committee (DAPCC) huaihawtin World AIDS Day hman a ni.

Mamit DAPCC member secretary Dr Lalnuntluangi Khiangte chuan, World AIDS Day chu December 1 ni mah se, kumin bik atan Mamit Bazar hmunah mipui tam laia hman an duh avangin Inrinniah hman a nih thu a sawi a, "HIV/AIDS chu a thawktu mi tlemtête'n kan do hneh lo a, India ram puma kan dinhmun enin khawtlang mipui, tu pawhin kan do a ṭul, " a ti. HIV vei leh vei loh inhre chiang turin engtik lai pawhin ICTC Mamit-ah counsellor ṭha tak hnuaiah inenfiah theih reng a nih thu a sawi bawk.