National Pollution Control Day hmang

December 2 kha National Pollution Control Day a ni a, Inrinni a nih avangin December 1, 2023 Zirtawpni khan Mizoram Pollution Control Board (MPCB) huaihawtin Sakawrhmuituai tlangah hman a ni.

National Pollution Control Day hmanna inkhawm hi MPCB scientist-C Dr Lalramnghaki Pachuau kaihhruaiin hman a ni a, MPCB executive engineer PC Lalmuanpuii'n thuchah a sawi. Hun hmannaah hian Sihphir Venghlun H/S Eco-Club member-te leh MPCB-a thawkte an tel a; environment humhimna tura nunphung thlak danglam ngaite thlâk turin an intiam a ni.

Day puala inkhawm zawhah Sakawrhmuituai tlanga kal ṭhinte bawlhhlawh paih an chhar khawm a, Sihphir khaw chhungah sarâng ip hmang lo tura inzirtirna an neih bakah, lehkha ip (paper bag) 200 chuang an sem bawk.

National Pollution Control Day hi kum tin December 2-ah hman ṭhin a ni a, kum 1984-a Bhopal Gas Tragedy-a thite hriatrengna atan leh thil tihbawlhhlawh (pollution) ṭhat lohzia leh environment humhalh a ṭulzia inzirtirna ní atan hman ṭhin a ni.