YMA-in kawng siam tura hmalakna Dec. 10, 2023 thleng ngaihchàn an rêl

YMA, Awithangpa Group chuan Kawnpui quarry leh Bualpui inkar kawng (national highway) chhe lutuk thawm ṭhaa hnawh mâm turin December 10, 2023 thleng contractor-te ngaihchàn an rél a, chumi chhunga thawm ṭhat a nih loh chuan December 11-ah hnatlangpui an ko dawn.

Awithangpa Group YMA hruaitute December 2, Inrinnia ṭhukhawm chuan, April 2023-a Hortoki-a inkhawmpuia an rel angin, Kawnpui quarry - Bualpui inkar kawng chhe lutuk siamṭhat a nih theih nan theihtawpin hma an la tih an tarlang a, "A hmunah pawh vawi eng emaw zat tlawh a ni. NHIDCL hotute leh contractor-te nen joint inspection neih a nih bakah, phone hmangte'n chak zawka hmalak a nih theih nan a bawhzui reng a ni," an ti.

October 18, 2023 khan contractor meeting neihpui a nih thu tarlangin Awithangpa Group YMA chuan, "November 15, 2023 thleng an hnathawh dan ngaihchàn a nih tur thu leh an hnathawhah lungawina a awm lo a nih chuan na taka hma lak a nih tur thu hrilh an ni. November 22 khan NHIDCL office, Kolasib-ah an General Manager leh Project Manager-te nen meeting neih leh a ni," an ti a, an hmalaknain awmzia a neih thu an tarlang.

Awithangpa Group YMA chuan, NHIDCL hotute'n kawng siamna atana revised estimate approval an nghah mek thu an sawi avangin ngaihchàn ṭha an tih thu an tarlang a, kawng bawl chhe zual lai, lirthei tana tlan hrehawm zual laite hnawh mám tura an ngenna tun thlenga tihhlawhtlin a la nih loh avangin December 10, 2023 thlenga hmalakna a awm loh chuan hna­tlangpui koh an rel tih an tarlang a ni.

December 11, 2023-ah hnatlangpui an ko a nih chuan, an hnatlan chhung chuan lirthei kal tlang theih a ni dawn lo tih an tarlang bawk.