Vanglaini logo

Dan bawhchhiaa CM puhna Lokayukta-in a ngaihtuah

Lengpui Airport tihchang-tlunnaa dan bawhchhiatna a awm nia ngaia chief minister Zoramthanga hêk a nih chungchang chu Mizoram Lokayukta chuan tun hnai khan a ngaihtuah.

Lokayukta hotute hnen aṭanga Vanglaini thu dawn danin, Chief Minister hek a nih chungchangah hian tun hnai khan hearing neih a ni a; complaint thehluttu Mizoram First Movement (MFM) chuan thil chhuitu Anti Corruption Bureau (ACB) report zir chianna atan hun pe turin an dil a, an dilna hi Lokayukta chuan a remti.

Chief Minister hêkna chhuitu ACB chuan CM Zoramthanga thiam lohna an hmu lo a; mahse, Lokayukta chuan ACB report chu an zir chian hnuah dan lam thiamte ngaihdan (legal opinion) a dil a, legal opinion aṭang pawhin CM hêkna chu tih zui vak ngaihna a awm loa ngaih a ni.

Lokayukta chuan ngun taka a ngaihtuah hnuah thubuai titawp tawp loa hearing neih ṭha a tih avangin tun hnai khan hearing an buatsaih a, PWD hotute leh MFM hruaitute a ko a ni. Hearing zawh a nih hunah CM hêkna kalpui zel dan turah Lokayukta chuan thutlukna a siam ang.

Tarlan tawh angin, MFM chuan Lengpui Airport tihchangtlunnaah dan bawhchhiatna a awma ngaiin, a mawhphurtua an ngaih CM Zoramthanga chhui turin April 11, 2022 khan Lokayukta-ah ngenna an thlen a; Lokayukta chuan chhui turin July 2022 khan ACB a hriattir a, ACB-in an chhui zui a ni.

ACB hnena chhui chiang tura an hriattir hmain Lengpui Airport tihchangtlun chung­changah hian GAD leh PWD-ah thil ṭhenkhat an zawt hmasa a, document pawimawhte an dil bawk.

GAD leh PWD aṭanga document an dawnte chu Lokayukta chuan an enfiah a, MFM-in CM Zoramthanga an puhna chu chhui zui tlakah ngaiin, chhui turin ACB an hriattir a ni.

MFM chuan, PWD enkawltu CM Zoramthanga chu a thuneihna hmang sual leh chhungkhat lainá duhsak uchuakah an puh a, "India Danpui Article 14 a bawhchhiat avang te, General Financial Rules 2017-a Rule 162 leh Vigilance Commission thu­chhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.