Minister/MLA-te'n ramri vengtute an tlawh

MNF party-in ruahmanna a siam angin minister leh MLA eng emaw zat chuan MNF party hruaitute nen tunlai hian Mizoram chhim leh hmar, chhak leh thlanga ramri vengtute an tlawh mek a; nimin pawh khan hmun hrang hrang an tlawh.

Minister C Lalrinsanga chuan nimin khan Chawngtea task force duty-te a tlawh a; Chakma Autonomous District Council (CADC) chief executive member (CEM) Rashkik Chakma leh hotu dangte CADC Rest House-ah kâwmin, CADC mamawhte an sawiho.

Inkhàrkhip vanga harsatna awm theite sorkarin a ngaihven reng tih sawiin C Lalrinsanga chuan, "Harsatna awmte zir chiang­ turin ka lo kal a ni. Covid-19 boruakah hian thil dang zawng aiin ei leh bar tur kan mamawh ber avangin harsatna lo thleng thei laka lo inrálrin a, intodelh tura hmalak a pawimawh," a ti.

C Lalrinsanga hian ramria duty-te chu harsatna an neihte a zawt a, Mizoram himna atan ramri uluk taka véng zel turin a fuih. Duty-te hnenah pawisa leh hmanraw hrang hrang a hlan a ni.

Minister of state TJ Lalnun­tluanga chuan May 27 khan Mizoram chhim tàwp lam ramria duty-te tlawh turin Lawngtlai a thleng a, district bawrhsap Shashanka Ala-i'n a lo dawngsawng. Law & Judicial Minister hian Lawngtlaia chief judicial magistrate BT Lala Sakechep pisa leh Transport department pisa sak thar a tlawh a, an mamawhte a en. Serkawr (Siaha district)-a sap missionary tuna la dam Violet-i (83) leh a pasal L Mark (90)-te a tlawh bawk.

TJ Lalnuntluanga hian nimin khan Vahia, Phúrà, Tokalo (Tongkolong), Demary leh ramri tàwp Lomasu-a task force duty-te a tlawh a, Rs. 5,000 leh silpauline pali ṭheuh a pe. Minister chuan, ramri véngtute chu ram tan an hlu tak zet tih sawiin, "Kan ram venghimtu hnam sipaite in ni. In thawh hahna leh in inpekna sorkarin a hria a, a lawm tak zet a ni," a ti.

Assembly deputy spea­ker Lalrinawma pawhin nimin khan Mizoram, Bangladesh leh Myanmar-te inrìna depa khua, Parva, Damdep-II, Bondubanga, Simnasara leh Gobasury khuate a tlawh a, task force duty-te nen an inkâwm.

Damdep-II hi Bangladesh ramri depa awm niin, ram pahnih inkarah Ṭheka lui a luang a, lui kâna Mizorama luh tum an awm ṭhin avangin harsatna an neihte an lo hrilh. Lalrinawma chuan, sorkarin chhuanchham leh harsa lutuka mipui an awm a phal lo tih sawiin, "Kan dam khaw­chhuahna turin hma a la mek zel. Hripui léng hneh turin kan zavaiin theihpatawp kan chhuah a ngai," a ti a; task force-te chu theihtawp chhuah zel turin a fuih.

Covid-19 Medical Operation Team chairman Dr ZR Thiamsanga, MLA chuan nimin khan hmàr tlangdung khaw hrang hrang leh hmar lama ramrite a tlawh a, Darlawn, Sakawrdai, Zohmun leh Mauchar khuaah khawtlang hruaitute nen an inkâwm bakah, damdawi leh hmanraw ṭhenkhat a pe. Vawi­inah Khawpuar, Zilthawkai (Tui­ruang kai), Vaitin, New Vervek, Tuivai leh Ratu khuate a tlawh leh ang.