Covid-19 veite thlalak tidarh lo turin Aizawl DCPU-in mipui an ngen

Aizawl District Child Protection Unit (DCPU) chuan tun hnaia kum tling lo naupang, Covid-19 veite thlalak leh video thehdarh lo turin mipui an ngen. Aizawl DCPU chuan, Covid-19 vei naupang, ZMC-a enkawl mekte chetla lai video pawh hmuh tur a awm nual tih sawiin, "Hei hian kan lainatna leh khawngaihna a tizual hle," an ti a; chutih rualin, danin naupangte thlalak leh an nihna tichiang thei tur thilte pho chhuah a phal loh thu an tarlang.

DCPU tarlan danin, The Juvenile Justice (Care and Protection of Children) Act, 2015 Section 74(1)-ah chuan, naupang chhan chhuah, venhim leh enkawl ngai emaw, dan bawhchhetu kum tling lo naupang nihna hriat theihna tura social media-a an thlalak leh video-te pho lan phal a ni lo. Pho chhuaktu chu thla ruk thleng tàntir emaw, Rs. 2,00,000 chawitir emaw, a pahnih hmanga hrem theih a ni. Dan hriat loh chu court hmaah chhuanlam a tling lo.

The Mizoram (Containment & Prevention of Covid-19) Ordinance, 2020, Chapter-II, Section 4(10)(a) angin, Covid-19 veite chauh ni loin, hri veia rinhlelhte thlengin media-ah tihlan phal a ni lo a; chumi bawhchhia chu thla thum thleng tàntir emaw, Rs. 5,000 chawitir emaw, a inkawp emawa hrem theih a ni. Naupang nihna tarlan chu a ṭul cháng a awm thei tih sawiin DCPU chuan, "Naupang tana ṭha tur a nih chuan anmahni enkawltu Board/Committee-in a phalsak thei a ni," a ti.