Kolasib-ah VC inthlan tur sawiho

Kolasib bawrhsap Dr H Lalthlang­liana hoin nimin khan DC pisaah village council inthlanna tur chungchanga hmalak dan leh ruahmannate sawiho a ni a, Kolasib district-a political party aiawhte an tel.

Dr H Lalthlangliana chuan, VC inthlan chu dik leh felfai taka neih a nih theih nan ngawrh taka inbuatsaih mek a nih thu sawiin, "District chhunga political party-te'n aiawh inruat a, kan inbuatsaihnate a rintlakin a ṭha tâwk a ni tih a tak ngeia min hmuhpui ṭhin ka duh a ni," a ti a; chu chu sorkar leh party-te tan a ṭangkai tur thu a sawi.

Bawrhsap chuan, inthlan ní-ah polling booth bulah mahni serial number zawnga voter an pun khawm a ṭul loh nan PDF-a siam voter serial number thawn chhuah vek a nih tawh thu a sawi a, "Vote thlak níah voter-te tan harsatna a awm loh nan polling booth páwnah dummy ballot paper enchhin tur târ chhuah tum a ni a, Election Commission-ah dilna a kal mek a ni," a ti.

Kolasib Bawrhsap chuan, an district-ah VC 56-ah inthlan tur a ni a, polling booth 92 buatsaih a nih thu te, returning officer leh village level officer-te training pek vek an ni tawh a, presi­ding officer-te tan August 19-ah training buatsaih a nih tur thute a sawi bawk.