Sorkarah eirûk leh kalsualna lakah thîkthu kan tihchhe dawn - ZPM VUC

ZPM party chuan nimin khan an pisaah chhung inkhawm an hmang a, ZPM Val Upa Council (VUC) hruaitu Bualhranga'n thu sawiin, sorkar tharah eirûk leh kalsualna lakah thîkthu an tihchhiat dawn thu a sawi.

Bualhranga chuan, VUC-in hruaitu induh deuh te, thinchhe deuhte a dawh zel dawn tih a sawi rualin, "Corruption chungchangah kal pelh thiang lo red-line (rin sen) kan kham dawn. Rìn sen dái pêl chu chief minister, minister leh MLA pawh ni raw sek sek, zero tolerance kan nei dawn. Traffic police hoin zero tolerance week vawi hnih/vawi thum kum khatah a nei ṭhin; VUC chuan kum 5 chhung kar khat ni loin kar 260 zero tolerance a nei dawn," a ti.

Corruption do chungchangah VUC-in sehna tur há a nei lo emaw tih ngawt tur a ni lo tih sawiin Bualhranga chuan, "Ha hriam tak a nei. Chief Minister, minister, MLA, party hruaitu lawkte a thlir reng dawn. Red-line kan tih kal pèl chu dîm hauh loin a seh chat dawn a ni," a ti a; corruption do chungchangah VUC chuan a tawp thlengin CM a thawhpui dawn thu a sawi.

Bualhranga chuan, rinawm taka mipui rawng báwlte chu malsawmnain a zui ṭhin thu sawiin, "Malsawmna hian sum leh pai mai a ni lo, tu leh fate hmuingilna leh chhungkaw hlimna a thlen ngei ngei ang. Mizo society-ah mi zahawm leh tlangtla in ni ang," a ti.

Ram siamṭhat hna chu Vanapa thlahte'n an theih lohna tur a awm loh thu sawiin Bualhranga chuan, "India Constitution hnuaia state-in thuneihna a neih hmang hian Nitish Kumar (Bihar CM), Pawan Chamling (Sikkim CM) leh Manik Sarkar (Tripura CM) te'n an tih theih chu Mizo zinga vantlang chunga mi ngaih nula leh tlangval rual 27-te hian in tih theih lohna bik tur a awm lo," a ti a; ram siamṭha tura chona hmachhawn turin ZPM MLA tharte a chah.

ZPM inkhawm hi treasurer C Lalṭanpuia'n a kaihruai a, MLA inthlan zawh taka an party aṭanga thlan tlinte inhmelhriatna hun hman a ni.