MLA atana thlante kum dinhmun

Mizoram Member of Legislative Assembly (MLA) atana thlan tlin mi 40 zingah ZPM ticket-a thlan tlin Jeje Lalpekhlua leh Baryl Vanneihsangi te chu kum 32 ve ve niin an naupang ber a; Serchhip biala ZPM ticket-a thlan tlin Lalduhoma (73) chu a upa ber.

MLA inthlanpuia thlan tlin mi 40-te kum chawhrual chu 54 a ni a; kum 2018 khan MLA thlan tlinte kum chawh­rual chu 54.05 a ni.

MLA atana thlan tlinte zingah kum 31-40 inkar mi pathum, kum 41-50 inkar mi 11, kum 51-60 inkar mi 13, kum 61-70 inkar mi 12 leh kum 70 chung lam mi pakhat an awm.

MLA atan political party pali - BJP, INC, MNF leh ZPM aṭangin mi 40 thlan tlin an ni a; ZPM party ticket-a thlan tlin mi 27-te kum chawhrual chu 53 niin an naupang ber.

MNF ticket-a thlan tlin mi 10-te kum chawhrual chu 54.7 a ni a, INC ticket-a thlan tlin pakhat chu kum 63 mi niin, BJP ticket-a thlan tlin mi pahnihte kum chawh­rual chu 59.5 a ni bawk.