Zoramthanga'n MNF president a nihna aṭanga bànna a thehlut

MNF president Zoramthanga chuan MLA inthlan neih zawh taka an party an chak lo chu a mawhphurhnaah a ngai a, party president aṭanga bànna nimin khan a thehlut.

Zoramthanga hian MNF president aṭanga bànna lehkha hi MNF senior vice president Tawnluia hnenah a thehlut a, "MLA inthlanah kan party chuan sorkarna an chang zo ta lo. Hetah hian hotupa ber ka nihna angin ka mawhphurhnaah ka ngai. Chuvangin, MNF president ka nihna aṭangin ka tih ngei tur nia ka hriat angin bànna ka rawn thehlut a, min lo pawmsak ngei ka beisei a ni," a ti.

An president-in bànna a thehluh chungchangah hian MNF chuan thuchhuah siamin, Zoramthanga bànna thehluh chu vawiin chhun dar 12 hian MNF National Core Committee (NCC) leh Political Affairs Committee (PAC) ten an ngaihtuah dawn thu an tarlang.

MNF chuan, mahni mawh­phurhnaa ngaia bànna thehlut ngam president an nei chu chhuan­awm an tih thu an tarlang a, "A kaihhruai MNF hian Pathian leh kan ram tan ti zelin, insang mara tho lehin, kan ram, kan hnam leh kan sakhua humhim turin a ding chhuak leh ngei ang tih kan a ring tlat. Kum 62 zet chàwl loa Mizoram leh hnam tana thawk tura MNF lo hruai tawhtu Pathianin MNF hi kaihruai zelin, a kaihthawh leh ngei kan ring nghet tlat a ni," an ti.