MNF Legislature Party leader atan Lalchhandama Ralte ruat

MNF party chuan MNF Legislature Party leader atan Lalchhandama Ralte an ruat a, secretary atan R Rohmingliana an ruat.

Mizoram Assembly inthlanpui neih zawh tâka MNF party aṭanga thlan tlin MLA-te chu nimin khan MNF president Zoramthanga inah an ṭhukhawm a, MNF Legislature Party dinin, hruaitu an inruat a ni. Deputy leader atan Lalrintluanga Sailo an ruat a, treasurer atan Prova Chakma an ruat bawk.

MNF Legislature Party member dangte chu - Lalrinsanga Ralte, Robert Romawia Royte, H Lalzirliana, Ramthanmawia, K Laldawngliana leh Rasik Mohan Chakma-te an ni.

MNF thuchhuah chuan, Mizoram sorkar tharin ram tana hna a thawhnaah an mawhphurhna hlen turin MNF Legislature Party chuan theihtawpin hna an thawk dawn tih a tarlang a, "Pathian leh kan ram tan tiin, ram leh hnam rawngbawl hna an thawk dawn a ni," a ti.