KHAWTHLIR

Thisen pe

Lungleia HDFC Bank chuan nimin khan thisen pek an huaihawt a, mipa 24 leh hmeichhia pahnihte'n Lunglei Civil Hospital tan thisen unit 26 an pe. Siahaa PYD (NEI)-te pawhin Siaha District Hospital tan thisen unit 26 an pe a, petute mipa 21 leh hmeichhia panga an ni.

Raltlan tanpuina

Central YMA chuan nimin khan hmun hrang hrang aṭangin Myanmar, Bangladesh leh Manipur buaina vanga Zo hnahthlak ráltlânte ṭanpuina tur pawisa a dawng. CYMA hian raltlante ṭanpuina tur hi Gharmura leh Dholchhora cheng Hrangkhawlte hnen aṭangin Rs 20,000, Mizoram Architect Forum aṭangin Rs 67,000 leh Zarkawt Kohhran Pavalai Pawl aṭangin Rs 40,000 an dawng a ni.

MCC hlîp

Mizoram Legislative Assembly general election a zawh tawh avang leh returning officer-te'n an chan ṭheuhah result an puan tawh avangin October 9, 2023 aṭanga Mizorama Model Code of Conduct (MCC) puan chu December 4, Thawhṭanni tlai khan hlih a ni.

Kawng khàr dawn

Kolasib SP Lalrinawma Traite chuan thupek chhuahin, NH-6 kawngpui, Bualpui quarry leh RTP Farm inkarah vawiin aṭangin chhun dar 11 leh chawhnu dar 2 inkarah kawngpui thawm ṭhat a nih dawn avangin lirthei tlân theih a ni dawn lo tih a tarlang. Thupek zâwm lote chu MV Act Section 177 hmanga hrem theih an ni a; harsatna nei leh sawi tur neite tan Kolasib Police Sation OC phone number 9862786385, Traffic Cell IC phone 9862306914-ah biak theih a ni.

Krismas sawiho

Hnahthial bawrhsap Chuauhnuna hoin sorkar hotu te, VC-te leh páwl hruaitute nimin khan DC pisaah an ṭhukhawm a; Krismas leh kum thar vuakvetah boruak muanawm tak a awm theih nan dan leh thupek kenkawh dan tur an sawiho. Ṭhutkhawmah hian additional DC Lalvenhima, additional SP Albert Lalnunpuia, BDO Lalbiakfela, VC, MUP, HKJC aiawhte an tel a ni.