J Lalhmingliana'n sorkar sum a bank account-a a dah dan chhui thuai turin sorkar phût

Mizoram Pradesh Youth Congress Committee (MPYCC) chuan thuchhuah siamin, Aviation Wing-a principal consultant Wg.Cdr. J Lalhmingliana'n sorkar sum a mimal bank account-a a dah chungchang chhui thuai turin Mizoram sorkar an phût nawn.

Wg.Cdr. J Lalhming­liana hian Civil Aviation Wing sum tam tham tak chu a mimal bank account, ICICI Bank account no. 240701500605-ah dan kalhin a dah lut nia hriain MPYCC chuan April 26, 2019 khan Lokayukta-ah complaint an thehlut a; Lokayukta chuan Mizoram Loka­yukta Act, 2014 Section 19 tlawhchhanin preliminary enquiry/investigation ti tur leh thla khat chhungin Lokayukta-ah report thehlut turin Anti Corruption Bureau (ACB) a hriattir a ni.

Lokayukta-in hun a pek chu thla khat a nih laiin, thla riat a ral hnuah pawh thâwm hriat tur a awm loh avangin MPYCC chuan January 11, 2020 khan press release siamin, Mizoram sorkar­in ACB kut a phuar em ni, tiin zawhna an siam a ni. January 14, 2020-ah MNF ṭhalai (MNYF)-in press release siam ve lehin, MPYCC-in Lokayukta leh CM Office-a lehkha an thehluh hnuah Lokayukta chuan ACB hnenah chhui turin a ti a, Chief Minister enkawl Vigilance Committee pawhin ACB hnenah May 16, 2019-ah lehkha a kaltir niin an tarlang.

MNYF tarlan MPYCC-in an tarlan chhâwn danin, J Lalhmingliana chungchang chu ACB-in an chhui a, 2019 Krismas hmain Lokayukta-ah report an thehlut tawh. Lokayukta-in hriat belh duh a neih avangin ACB-in report an buatsaih leh a, Krismas-in a nan zui avangin Lokayukta-ah an thehlut hman ta lo.

ACB chu report kimchang tak thehlut turin an inbuatsaih a, an khawmuanna chhan chu Krismas vuakvêt vang a ni.

ACB khawmuan chhan - Krismas vuakvêt vang nia MNYF-in an tarlan laiin, 2019 Krismas vuakvet aṭanga thla nga a liam hnuah pawh thawm a la awm lo tih sawiin MPYCC chuan, "Lehkha kan thehluh aṭanga kum khat a liam hnuah pawh hmalakna hriat tur a la awm loh avangin kan ngaih a ṭha thei tawh lo. Sorkar hian J Lalhming­liana chungchanga thil dik lo awm chhui mek hi a bànsan ta mai em ni? Nge, zâwi zâwia tih zùzì a tum? A chhuitute kut a phuar zawk em ni?," an ti.

Congress ṭhalaite chuan, J Lalhmingliana'n dan kalha sorkar sum a tih danah Zoram mipuiin thu dik an hriat ngei theih nan chhui hna bànsan lo a, rang taka hma la tur leh thu dik puang vat turin Mizoram sorkar an phût a ni.