Mamit District Jail enfiah

Integrated Child Protection Scheme (ICPS), Mamit district hnuaia Jail Inspection Team chuan nimin khan Mamit District Jail an tlawh a, jail-ah naupang, kumtlinglo awm an awm leh awm loh leh jail dinhmun an enfiah.

Thla thum danah jail endik tura tih a nih angin Mamit Jail Inspection Team hian an leader F Laltlansangi, magistrate hoin District Jail an enfiah a; naupang kumtlinglo, nu leh pa tàn vanga jail chhunga awm ve an awm leh awm loh an endik a, naupang an awm lo a ni.

Team leader F Laltlansangi chuan, jail-a tángte'n chanchinbu an chhiar ve theih nan ruahmanna awm thei se ṭha a duh thu a sawi.

Inspection team-ah hian DCPO C Lalremruati, Tommy Hmingdailova, Zatluanga Sailo, P Lalchunglura, Hmingsangzuali leh Lalrinchhani te an tel.

Mamit District Jail an tlawh lai hian táng mi 53 an awm mek a, mipa 45 leh hmeichhia pariat an ni.