RBSK hnuaiah kuminah zirna-in 2,487-ah naupang 1,88,959 dinhmun enfiah tawh

National Health Mission (NHM) hnuaia Rashtriya Bal Swasthya Karyakram (RBSK) kaltlangin Mizoramah sorkar kum kal mekah October 2023 thlengin anganwadi centre leh sikul 2,487-ah naupang 1,88,959 enfiah an ni tawh a; kum 2022-23 chhung khan anganwadi centre leh sikul 5,869-ah naupang 3,06,694 enfiah an ni.

RBSK hnuaiah hian mobile health team din niin, team tinah medical officer pahnih, pharmacist leh health worker pakhat ve ve zel an awm. Sorkar laipui ruahman angin, kum khat chhungin sikul zawng zawng vawi khat tal an tlawh chhuak ve tur a ni a, anganwadi centre-te chu vawi hnih tal an tlawh tur a ni.

Anganwadi centre leh sikula naupangte endiknaah taksa leh rilru lama harsatna neite chu a theih ang angin a hmunah an enkawl nghal a, a hmuna enkawl mai theih lohte chu district early intervention centre (DEIC)-ah hruai an ni ṭhin. DEIC-a enfiah hnuah DEIC-a enkawl nghal theihte an enkawl a, enkawlna ṭha lehzual mamawhte chu hmunpui lamah an thawn leh ṭhin.

Vanglaini zawhna chhanga NHM mission director Dr Eric Zomawia tarlan danin, sorkar kum kal mekah RBSK mobile health team-te'n sorkar enkawl leh sorkar ṭanpuina dawng sikul tlawh chhuah tur 2,941 an nei a, chu'ngah chuan zirlai 1,76,465 an awm anga chhût a ni. October 31, 2023 thleng khan sikul 1,819 (61.84%) tlawh tawhin, zirlai 90,598 (51.34%)-te hriselna dinhmun an endik.

Kum kal mekah anganwadi centre tlawh tur 2,219 a awm a, kum khat chhungin vawi hnih tlawh chhuah tur a nih avangin tlawh tur an neih zat chu 4,438 a ni. October 31, 2023 thlengin anganwadi centre 1,668 tlawh tawhin, chu chu tlawh tur an neih aṭangin 37.58% chiah a ni a, naupang enfiah tur zat 2,47,786 aṭangin 98,361 (39.69%) an enfiah tawh.

Kum 2023-24 chhunga anganwadi centre leh sikul tlawh tur zat 7,379 zinga 3,487 (47.26%) an tlawh tawh a, naupang enfiah tur zat 4,24,251 zinga 1,88,959 (44.54%) an enfiah tawh a ni.

Sorkar kum liam ta 2022-23 chhung khan sikul 2,941 tlawh tur a nih laiin, 2,574 (87.52%) chiah an tlawh hman a, naupang endik zat 1,76,720 niin, target 1,76,465 aiin 255-in a tam zawk. Anganwadi centre tlawh tur zat 4,438 zinga 3,295 (74.25%) tlawhin, naupang enfiah tur 1,96,840 aṭangin 1,29,974 (66%) chiah an endik hman bawk.

Kum 2022-23 chhunga RBSK mobile health team-te'n sikul leh anganwadi centre tlawh chhuah tur an neih zat chu 7,379 niin, 5,869 (79.54%) an tlawh hman a, naupang endik tur zat 3,73,205 aṭangin 3,06,694 (82.18%) an endik hman a ni.