Health Minister-in Covid-19 vei enkawltute a kâwm

Health & Family Welfare minister Dr R Lal­thang­liana chuan May 27, Nilaini tlaiah khan a pisaah Covid-19 vanga State Referral Hospital (ZMC)-a damlo awm enkawltu doctor leh nurse-te a kâwm a; an inpekna leh huaisenna fakawm a tih thu hrilhin, lawm­thu sawina thilpek a hlân.

Health Minister chuan, damlo enkawl damtute chu Mizoram tan Covid-19 pasalṭhate an nih thu sawiin, "Pathian kaihhruaina leh Mizoram chhung leh pawna mi ṭhahnemngaite ṭawngṭaina chhanna a ni. Record ropui leh chhuan­awm tak in nei a ni," a ti a; HFW department inbuatsaihna a ṭha tâwk a ni tih a tihlan thu a sawi.

ZMC-a Medicine HoD Dr PC Lalramenga chuan, sorkar inbuatsaihna a ṭhat thu sawiin, "Covid-19 natna hi hriat chian har tak a la ni rih a, damlo enkawl ngai kan neih tirh khan kan zâm lo chu a ni lo a, mahse, chîâi loin kan thawh turte ṭha takin kan ti thei a ni," a ti a; ZMC bakah hmun hrang hranga Mizo doctor-te biakpawh theiha an awm chu an hlâwkpui thu a sawi.

Mizorama Covid-19 vei damlo pakhat enkawltute hi doctor pariat, ward superintendent pathum, nurse 25 leh IV grade pali an ni. Damlo hi damdawi-inah ni 45 a awm hnuah May 9, 2020-ah a chhuak a, a chhuah hnuah ni 14 chhung home quarantine-a awm leh hun pawh a hmang zo tawh a ni.

Damlo enkawltute chuan, ICMR leh AIIMS protocol fimkhur taka an zawm thu sawiin, "Tunah hian ICU-ah damlo a rualin 14 enkawl theih a ni a, a ṭul huna hman atan ICU khum 22 awm theihna ruahman lâwk a ni bawk," an ti.