Kolasib-ah Ayurvidya buatsaih

Health & Family Welfare department leh Directorate of AYUSH chuan nimin khan Adventist English School, Kolasib-ah a thlàwna inentirna, Ayurvidya (School Health and Education Programme) an buatsaih.

Ayurvidya-ah hian Kolasib District Hospital aṭangin senior medical officer (Ayush) Dr C Vanlalhlimpuia hoin thawktute'n hun an hmanpui a; zirlai leh zirtirtu mi 73-te hriselna dinhmun an endik a, damdawi eng emaw zat an pe nghal. Ayush damdawi chungchang leh hriselna leh thianghlimna inkungkaih dante an zirtir bakah, taksa insawizawi dante an tihpui bawk.