Manipur-a Zo pawlte'n ZPM an lawmpui

Manipur-a Zo hnahthlak páwl hrang hrangte intelkhawmna Zo United chuan, Mizoram sorkarna siam tura MLA inthlanpuia chak ta ZPM party chu an lawmpui thu an thawn. Manipur-a Zo hnahthlak pawl dang ṭhenkhatte'n Mizoram inthlan result chungchangah thuchhuah an siam bawk.

Zo United chuan ZPM President hnenah lehkha thawnin, Mizoram inthlanpuiah sorkar siam tura an chak chu thinlung taka an lawmpui thu an tarlang a, "Kan hlim em em a ni. Lalpa'n ram leh hnam kalsiam rel ṭha tur leh siam thar ṭha tura mawhphurhna in koa a nghat hi lawmawm kan tiin, khawvel huap Zo fate hian nangmahniah beiseina sang tak neiin nghakhlel takin kan thlir reng dawn che u," an ti a; duhsakna an hlan a ni.

Indigenous Tribal Leaders’ Forum (ITLF) chuan thuchhuah siamin ZPM party an lawmpui thu an tarlang a; ZPM sorkar hnuaiah Mizoram mipuite'n hma lam hun ṭha zawk an neih an beisei thu sawiin, "Mizoram ṭhatna leh hmasawnna atana nghet taka ding tlat tur leh Kuki-Zo hnam inpumkhatna atan hma la zel turin ZPM leh Pu Lalduhoma te kan ngen a ni," an ti.

Lamka, Manipur-a hmunpui nei ITLF hian chief minister kal chhuak Zoramthanga thlahna thu tarlangin, Manipur buainaa hma a laknate leh Zo hnahthlakte inpumkhatna tura a thawh zawng zawngah an lawm thu an tarlang.

Zomi Council Steering Committee (ZCSC) pawhin thuchhuah siamin, Mizoram Assembly inthlanpui neih zawh taka chak ta ZPM chu thinlung takin an lawmpui a, duhsakna sang ber an hlan tih an tarlang a, "ZPM-in Mizoram mipui mamawh sorkar ṭha an din ang a, hmasawnna ngêlnghet, tluantling leh rintlak an thlen ang tih kan beisei a, kan ṭawngṭaina pawh a ni. Mizoram páwna Zo fate tan pawh an tlânchhe hauh lo ang tih kan ringin kan beisei tlat bawk," an ti.

ZCSC chuan, Mizoram inthlanpui chu an ngaihven reng tih sawiin, "Tu pawh sorkar se, Manipur-a Zo fate hi an thlahthlam lo ang tih kan ring tlat a, ZPM-in sorkar an siam turah pawh kan phûrin kan thlamuang em em a ni," an ti. Manipur-a Zo fate chu thih leh dam karah an la léng mek tih sawiin, "ZPM sorkar lo ding turin min ṭanpui leh ṭanpui loh hian kan tan kawngro a su hle dawn a, sorkar hotu turte hi hnam vei tak tak an nih hlawm avangin min ṭanpui ngei ang tih pawh kan ringin kan thla a muang hle a ni," an ti bawk.

ZCSC hian chief minister tur Lalduhoma chu mimalin duhsakna an hlan a; chutih rualin, sorkar aṭanga tla ta MNF party leh chief minister kal chhuak Zoramthanga te an tawrhpui thu an tarlang bawk a ni.