Contract aiah raw ṭiak sem turin ngen

ZPM Ṭhalai chuan nimin khan thuchhuah siamin, MNF party worker-te'n thil hmanhmawhthlak pawh ni loa contract an thawk mawlh mawlh chu pawi an tih thu an tarlang a; hun khirh lai a nih avangin mipui hmaizaha insûm rih tur leh MNF party worker-te hnenah contract aiah raw (rua) ṭiak sem mai turin sorkar an ngen.

ZPM ṭhalaite chuan, Covid-19 vangin sorkarin sumah harsatna a tâwk tih sawiin, "Chumi chhâwk zângkhai turin MLA tam zawkin May-December chhung an hlawh aṭangin 30% leh MLA fund cheng nuai 50 an pek lai leh, kohhran, pawl leh mimal ṭhahnemngaite'n CM Relief Fund-a sum an chhûn ruih ruih laia MNF party worker-te'n thil hmanhmawhthlak pawh ni loah contract an lo thawk mawlh mawlh hi pawi kan ti," an ti a; hri léng vanga hun khirh lai a nih avangin, mipui hmaizaha insúm rih turin sorkar an ngen a ni.

Chief Minister-in rua a tuipui tih sawiin ZPM Ṭhalai chuan, "Rua chìn a hlâwk turzia a sawinaah IAS officer-te pawh an hna bànsana raw hmun an siam duh hial a rin thute pawh a lo sawi tawh. Chuti khawpa hlâwkpui theih a nih dawn chuan an party worker-te hnenah hian contract phuahchawp tak tak pe loin, rua/mau ṭiak sem mai zawk turin kan ngen a ni," an ti.