Mizoramah Bru-te an thlamuang Chhawmdawlna dawn ve an duh

Mizorama awm Bru-te chuan Mizoramah an thlamuan thu an sawi a, chutih rualin, Ministry of Home Affairs (MHA) bultuma Mizoram sorkar, Tripura sorkar leh Tripura-a Bru aiawhte'n inremna an ziah anga Tripura-a Bru-te'n chhawmdawlna an dawn tur ang an dawn ve an duh thu leh an dawn ve theih nan hmalak an tum thu an sawi tel. Hetih lai hian, Tripura-a Bru-te pawhin inremnaah an lungawi thu an sawi bawk.

Vanglaini palai zawhna chhangin Mizorama Bru awmte inzawmkhawmna, Bru Coordination Committee (BCC) chairman Elvis Chorky chuan, Mizorama an awm avangin lâwm lohna an neih loh thu a sawi a, "Mizoramah kan thla a muang a, awm duh lohna chhan tur kan nei lo. Inremna ziah a nih tâk avanga Tripura lama awm duh leh ta zawk pawh an awm lo," a ti.

Elvis Chorky chuan, Tripura-a awmte duhsak bik an nia an hriat thu sawiin, "Keini chu sorkar thu zâwma Mizorama lêt kan ni. Tripura-a awm hlen turte'n an dawn ang kan dawn ve ngei theihna atan hma kan la dawn. Kan rawn kîra kan dawn hian Tripura-a awm hlen turte'n in sakna atana an dawn tur pawh a zat lo," a ti a; an thil phût chu Mizoram sorkar hnenah thlenin, chumi hnuah sorkar laipui an dàwr leh tur thu a sawi.

BCC Chairman sawi danin, a tìr lama Mizorama rawn kîrte tan development package rawtna a awm a, thutàwp siam a ni lo. An rawn kîr tirhah Rs. 80,000 leh kum khat chhung free ration an dawng a ni. Tun dinhmunah Mizoramah Bru chhungkua 6,000 chuang an awm mek.

Mizoram Bru Displaced People Forum (MBDPF) hruai­tute chuan Vanglaini zawhna chhangin, January 16, 2019-a inremna ziah tâkah an lungawi thu an sawi a, "Mizoramah chhoh kan duh si lo a, chuvangin, inremnaah kan lungawi. Tun dinhmunah chuan Mizorama kîr duh emaw, Mizorama awm mek Tripura lama rawn kal duh an awm kan hre lo," an ti. MBDPF hruaitute chuan, Union Home minister Amit Shah an kawm leh dawn thu sawiin, chutah chuan inremnaa siamṭhat ngai leh tihdanglam deuh ngai nia an hriatte sawipui an tum thu an sawi a ni.

Tripura-a Bru-te dawn tur Ṭhenkhat

•    Chhungkaw tin Rs. 4,00,000 pek an ni dawn.

•    Chhungkaw tinte in sakna tur ram ft. 30X40 pek an ni ang.

•    In sak ṭanpuina atan Rs. 1,50,000 ṭheuh an dawng dawn.

•    Kum hnih chhung thla tin Rs. 5,000 pek an ni dawn.

•    A thlawnin ration kum hnih chhung pek tur an ni.

•    Tripura sorkarin bank account, Aadhaar card leh ration card an buaipuisak dawn.