Tangkhang phurtu bus chesual

Delhi-a Mizo tangkhang zinga mi pakua phurtu bus RJ-14 TE-4359, Siaha pan chu nimin zing dar 5 vel khan Ṭawipui South khaw dáiah chesualin, kawng thlangah ft. 25 vel a lum a, hliam an awm nãin, thi an awm lo.

Force bus tê chesual ta hi May 24, 2020-a Delhi chhuahsana Mizoram rawn pan a ni a; Mizo pakua bakah, a khalhtu pahnih (hnam dang ve ve) an chuang. Mizote hi hmei­chhia pahnih (Delhi-a hnathawk leh zirlai) leh mipa pasarih (zirlai vek) an ni. Hliam na deuh ber hmeichhia chu a kawng a ná a, ngaihtuahawm erawh a ni lo a, mi dang chu an hliam vak lo niin Ṭawipui South YMA vice president C Zohlimpuia chuan a sawi.

Ṭawipui aṭanga thu dawn danin, chetsual thu hriat a nih veleh Ṭawipui South damdawi-ina medical officer Dr C Lalhlim­puii leh khawtlang hruaitute'n an buaipui nghal a; Lawngtlai aṭangin medical team leh ambulance tirh a ni bawk.