Delhi aṭangin mi 1,500 vel rawn chhuak

Mizoram sorkar leh The Mizo Welfare Association, Delhi ruahman angin, Delhi leh a chhehvela Mizo tangkhang eng emaw zat zinga a thawh khatnaa haw turte chuan nizan khan rél (Shramik special train)-in Delhi an chhuahsan.

Chhinchhiah dan chuan, nizana Delhi aṭanga rawn haw mekte hi mi 1,502 an ni a; Delhi-a awm mi 1,106, Chandigarh 20, Haryana 149, Himachal Pradesh 26, Jammu & Kashmir 4, Noida & Greater Noida 93, Punjab 38 leh Uttarakhand-a awm mi 66-te an ni. Mi 1,417 hian rel chuan man mahni an intum a, mi 85-te erawh chu sorkarin a tumsak thung.

Haw turte tan nimin zing dar 8 aṭangin medical screening tih a ni a, screening paltlangte chauh haw theih a nih avangin, haw tura inhriattir zawng zawng an haw vek thei em tih hriat a la ni lo. Rêlah eng lai pawha hmai tuam reng tura tih an ni a, kawng laka ei leh in tur pawh mahni intum vek tura tih an ni.

Delhi aṭanga rawn haw mekte awmna district chu - Aizawl mi 627, Lunglei 118, Siaha 240, Serchhip 49, Champhai 116, Mamit 64, Kolasib 98, Lawngtlai 124, Hnahthial 7, Saitual 26 leh Khawzawl mi 33 an ni.