Lalduhoma'n Governor aṭangin sorkar siam theihna a dawng

7th December, 2023

ZPM Legislature Party (ZLP) leader Lalduhoma chuan nimin khan Raj Bhavan-ah Governor Dr Hari Babu Kambhampati hnenah sorkar a siam theih thu a thlen a, Governor hian chief minister appointment order leh sorkar siam theihna a lo pe nghal. Lalduhoma hi ZLP deputy leader K Sapdanga leh member Vanlalhlana-te'n an ṭawiawm.

Governor an hmuh zawha thuthar thehdarhtute zawhna chhángin Lalduhoma chuan, "Minister tur ka la tifel lo. December 8, 2023 chawhma dar 11-ah swearing-in neih a ni ang. Kar leh Thawhlehni velah session hmasa ber kan nei dawn," a ti.

Lalduhoma chuan, Governor-in theihtawpa thawhpui a tum thu a lo hrilh tih sawiin, "Central lam dàwr kawngah pawh a ṭangkai thei ang bera hman tura a inpeih thu min hrilh," a ti a, Governor-in a lo dawnsawn danah an lawm thu a sawi.

ZLP Leader chuan, Mizoram ang state pachhia, budget tlem tan innghahna ber chu centrally sponsored scheme (CSS) a ni lo thei lo tih sawiin, "CSS kalpui dan Governor-in lungawithlak a ti lo. A aia ṭha zawk leh a aia tam zawk dil chhuak thei tura hna thawk chak turin min duh," a ti.

Ráltlân chungchanga zawhna chhangin Duhoma chuan, "Union Home Minister nen kan inbe tawh a, a rang lama Delhi-a kalte pawh a ngai ang. A bikin Manipur-a mite chu India khua leh tui tho, kan unaute an ni," a ti a, theihtawpin an enkawl zui dawn thu a sawi.

Lalduhoma chuan, Myanmar aṭanga ráltlânte tan pawh theihtawp an chhuah dawn tih sawiin, "External Affairs Minister hi IPS-a kan batchmate a ni a, kan inbe tawh. A rang lama hmuha Indian foreign policy leh Myanmar chungchanga India sorkar ngaihdante inhrilh hmasak a ngai," a ti.

ZLP Leader chuan, ráltlânte chungchang chu mihring mihrinna thil (humanitarian issue) a nih thu sawiin, "Kan hmelhmate pawh an thih dawn chuan kan enkawl ṭhin," a ti a; ṭha taka enkawl zel an nih theih nan central lamah theihtawp an chhuah dawn thu a sawi.

Vanglaini thu dawn danin, December 8, 2023-a Chief Minister lak luh a nih rualin minister dang zawng pawh lak luh nghal a ni dawn a; hemi ní hian protem speaker tur thlan a ni ang.