MNF-in Zoramthanga bànna an pawm lo

MNF party thuneitu sang, National Core Committee (NCC) leh Poli­ti­cal Affairs Committee (PAC) chuan MNF president Zoramthanga'n president aṭanga bànna a thehluh chu an pawm lo.

MNF NCC leh PAC hi nimin khan an ṭhukhawm a, an ṭhutkhawm zawhah MNF senior vice president Tawnluia'n thuthar thehdarhtute kâwmin an rorelte a hrilhfiah. Tawnluia chuan, Zoram­thanga bànna an pawm loh thu sawiin, "A hoin sorkarna kan siam leh ngei kan beisei," a ti.

Tawnluia chuan, kum 2023 MLA inthlanpuiah MNF party-in sorkarna a chan zawh loh avangin Zoramthanga'n a mawh­phurhnaa ngaiin an party president aṭanga bànna a thehluh thu sawiin, "NCC leh PAC joint meeting chuan zahawm a tiin, a puitlinzia tilangtu niin kan hria," a ti a, inthlana an chak loh chhan chu Zoramthanga mawhphurhna bik ni loin, an vaia mawhphurhna nia an hriat thu a sawi.

Zoramthanga'n bàn a dilna an pawm loh thu sawiin Tawnluia chuan, "MNF president a nihna hi chelh zui zel se kan ti," a ti a; an thutlukna chu Zoramthanga a hrilh tawh tih sawiin, "Ani pawhin bàn luih a tum lo, MNF president nihna ṭha takin a chelhzui leh dawn," a ti.

MNF Senior Vice President chuan, MNF dintu leh president hmasa ber Laldenga thih hnuah Zoramthanga'n an party a kaihhruai thu sawiin, "A kaihhruaina hnuaiah ṭum thum sorkarna kan siam tawh," a ti a, a kaihhruaina hnuaiah sorkarna an siam leh ngei pawh an rin tlat thu a sawi bawk.