Aizawl SP-in hàlpuah khapna zâwm turin ngen

Aizawl SP Rex Zarzoliana chuan Krismas leh kum thar vuakveta district magistrate-in hàlpuah leh silai lem mu kâp chhuak thei khapna thupek an chhuahte zâwm ṭheuh turin mipui a hriattir a; kum 2022 Krismas leh kumthar 2023 vuakvetah khapna thupek zâwm lo mi 14 man an ni a, thubuai 11 ziah luh a nih thu a tarlang.

Rex Zarzoliana chuan, hâlpuah leh silai lem khapna thupek chu mi tam zawkin an zawm ṭhat laiin, mi ṭhenkhatin dan an bawhchhiat ṭhin thu a tarlang a, "Dan bawhchhetute lakah a theih ang chin chinah police chuan hma lain, hrem an nih theih nan an lakah thubuai ziah luh ṭhin a ni. Heng mite hi court-in thiam loh chantirin pawisa a chawitir a ni," a ti.

Khapna kalpui chhunga hâlpuah leh silai lem a mu kap chhuak theite kawl, hâl, hmâng hriate chu Aizawl PS phone number 8794747291, Bawngkawn PS phone number 8794747292, Vaivakawn PS phone number 8794747293, Kulikawn PS phone number 8794747294 leh Zonuam outpost phone number 8794747295-ahte whatsapp hmangin thlalak leh video-te thawn turin Aizawl SP chuan mipui a ngen a ni.