KHAWTHLIR

ZLP hruaitu thlang

ZPM Legislature Party (ZLP) member-te chu December 5, Thawhlehni zan khan an chief ministerial candidate Lalduhoma inah an ṭhukhawm a, leader leh deputy leader tur an thlang. Lalduhoma'n thuthar thehdarhtute a hrilh danin, K Sapdanga'n leader atan Lalduhoma a rawt a, Lalduhoma'n deputy leader atan K Sapdanga a rawt thung. Rawtna lut hi member-te'n an pawm ve ve a, secretary leh treasurer tur chu hun danga ruat turin an dah a ni.

Rûi thinte tan hmun siam dawn lo

Laipuitlang Village Defence Party chuan thuchhuah siamin, December 9, 2023 zan aṭangin an vengah zu, ruih theih thil leh mi awm ṭha duh lote lakah hma an lak dawn thu an puang. Veng chhung a thianghlim theih nan theihtawpin hma an la mek zel tih tarlangin, "December 9, 2023 zan aṭangin zu, ruih theih thil leh mi awm ṭha duhlote tan hmun kan siam dawn lo a, hetiang mite chu veng chhung rawn tlawh lo turin kan inhriattir lâwk a ni e," an ti. An thu zâwm lote chungah eng pawh thleng se sawi buai theih a nih dawn loh thu an tarlang bawk.

Pangang khawi zirhona buatsaih

Serchhip District Sericulture Office leh Research Extension Centre, CSB, Aizawl chuan Silk Samagra-2 Project hnuaiah nimin khan Serchhip Hmarvengah Baktawng, Bungtlang, Chhiahtlang, Hualtu leh Serchhipa loneitute tan training an buatsaih a, Sericulture director V Zothansanga'n a hmanpui. Mithiamte'n silk pangang khawi chungchangah thil hrang hrang an zirtir a ni.

Hunpui hman dan tur sawiho

Lunglei DC Ramdinliani kaihhruaia nimina sorkar hotute leh khawtlang hruaitute ṭhukhawm chuan, Krismas leh kumthar vuakvetah Lunglei district-ah hàlpuah, hàlmawi, silai lem mu nei chi, meithallàwn (sky lantern) zawrh leh hman khap an rêl. Zu leh ruihhlo endik dan tur te, no vehicle zone siam dan tur te, tlawmngai pawl leh police-te duty dan tur te, veng chhung lunlai leh kawn chei tura ngenna siam chungchang leh Krismas thilpek chung-changte an sawiho bawk.