Dan loa sumdawnna tihrêm a nih theih nan Synod-in hmalak an rêl

Synod Inkhawmpui vawi 100-na, Mission Veng biak-ina neih mekah nimin khan rorel ṭan a ni a; Mizorama dan loa sumdawnna tihrêm a nih theih nan hmalak an rêl.

Synod vawi 100-naah hian nimin zing khan moderator kal chhuak Rev. Dr C Chawnghmingliana'n Rev. R Vanlalnghaka hnenah moderator mawhphurhna a hlan hnuah moderator thar kaihhruaiin rorel a ni.

Presbytery pahnih - Aizawl Bethel leh Aizawl Hmar aṭanga rawtna, 'Dan loa sumdawng tihrêm dan kawng zawn' chungchanga hmalak an pawm a, Synod Executive Committee (SEC) bawhzui turin an dah.

Kum 2024 Synod inkhawmpui moderator atan Rev. RC Lalnghakliana an thlang a; probationary pastor thawk mek mi 18 chu pastor atan nemngheh turin an pawm a, pro.pastor atana lak thar mi 18-te pawh dahngheh turin an pawm bawk a; Pathianniah nemngheh/dahngheh an ni ang.

Kum 2027-a inkhawmpuina atan Ramhlun North biak-in an thlang a; a hma lam kuma Synod neihna turte chu kum hmasa lamah rel a lo ni tawh a, kum 2024-ah Mission Vengthlang biak-in, kum 2025-ah Zarkawt biak-in, kum 2026-ah Chanmari biak-inah nghah a ni dawn. Pastor bial thar panga - Kolasib Ṭumpui, Buhchangphai, Dárlâk, Bawrai leh Saipûm bialte hawn remtih a ni bawk.

Synod inkhawmpuiah hian December 9, Inrinni thlengin chhunah rorel a ni dawn a, zanah Pathian biak inkhawm a awm ṭhin dawn a ni.