Party hrang hrang vote hmuh zat : ZPM-in vote 37.86% an hmu

7th December, 2023

MLA inthlanpui neih zawh taka assembly constituency 40-ah vote nei mi 8,52,088 awmin, vote tla (valid vote) 7,01,872 a ni a, vote tla zinga 2,65,755 chu sorkar tura chak ta ZPM-in an hmu a, 37.86% a tling.

Vote tla zat aṭanga chhûtin, ZPM party candidate mi 40-te vote hmuh belhkhawm 2,65,755 chu 37.86% a ni a; ZPM hi bial 27-ah chakin, bial pangaah pahnihna an ni.

MNF candidate mi 40-te vote hmuh belh khawm chu 2,46,338 niin, 35.10% a tling a; MNF hian seat 10 an la a, bial 28-ah pahnihna an ni. BJP candidate mi 23-te'n vote 35,524 an hmu a, vote tla zat aṭangin 5.05% chauh a nih laiin, bial pahnih an la a; INC candidate mi 40-te'n ram pumah vote 1,46,113 hmuin, an vote share chu 20.82% a ni a, bial pakhatah chiah an tling thung.

Lalpa Chhiahhlawh Intelkhawl candidate mi 21-te'n vote 2,869 hmuin, 0.4% a ni a; Aam Aadmi Party (AAP) candidate mi paliin vote 615 (0.09%) an hmu. Party/pawl behchhan nei loa ding (independent candidate) mi parukte vote hmuh belhkhawm chu 1,880 (0.27%) a ni.

Kumin inthlanpuiah hian INC, MNF leh ZPM party-te'n constituency 40-ah candidate an dah a, BJP-in bial 23 an chuh. AAP-in candidate pali an nei a, Lalpa Chhiahhlawh Intelkhawmte (LCI) tih hminga independent candidate mi 17-te'n bial 21 an chuh a, party/pawl behchhan nei loa independent candidate mi paruk an awm bawk.

Bial 40-ah candidate 174 an awm a, candidate 174-te vote hmuh belh khawm chu 6,99,094 a ni a, candidate zinga thlan tur hre loa NOTA hmettu mi 2,778 an awm. MLA atana ZPM party aṭanga thlan tlin mi 27-te vote hmuh belhkhawm chu 2,17,435 a ni.

Election Commission of India (ECI) tarlan danin, Mizoram MLA inthlanpuiah MLA atana thlan tlin mi 40-te vote hmuh belh khawm chu 3,11,707 a ni. Thlan tlin tâk mi 40-te vote hmuh belh khawm aṭang chhûtin, ZPM aṭanga thlan tlin mi 27-te'n 69.75% (vote 2,17,435) an chang a; MNF aṭanga thlan tlin mi 10-te'n 22.51% (vote 70,172), BJP aṭanga thlan tlin mi pahnihin 4.10% (vote 12,804) leh INC aṭanga thlan tlin pakhatin 3.62% (vote 11,296) an chang bawk.