Kum 2018-19 hnuah advertisement chhuah loin zirtirtu 1,135 lâk a ni

Mizoram sorkar chuan kum nga chhung, sorkar kum 2018-19 leh 2023-24 inkarah a nghet leh nghet loin zirtirtu 2,272 a la a, chu'ng zinga 1,135 chu advertisement chhuah loa lâk an ni.

RTI Act tlawhchhana zawhna School Education Directorate SPIO-in a chhan danin, sorkar kum 2018-19 leh 2023-24 chhungin Mizoram sorkar chuan primary school, middle school leh high school-ah a nghetin zirtirtu 275 leh a nghet loin zirtirtu 862 a la a; zirtirtu indaih loh zual phuhrûk nan stop gap arrangement-in MNF flagship programme SEDP sum aṭangin Human Resource Development Board-in zirtirtu 1,135 an la bawk.

Kum 2018-19 leh 2023-24 chhunga zirtirtu lâk zawng zawng chu mi 2,272 an ni a; chutih laiin, primary school zirtirtu 221, middle school zirtirtu 301 leh high school zirtirtu 120 an pension thung.

Zirtirtu 2,272 lak zinga a zatve tling lo deuh 1,135 chu adverisement chhuah loa lak an ni a; mi 1,137 chu advertisement chhuaha lak an ni.

SPIO-in zawhna a chhan danin, Mizoram sorkar hnuaia P/S, M/S leh H/S-ah zirtirtu awm tura ruahman (sanctioned post) 6,106 a awm a; chu'ng zinga post 3,186 chiah hnawhkhah niin, post ruak 2,920 a awm mek.

Sorkar sikul hrang hrang - P/S, M/S leh H/S-ahte hian kum 2018-19 leh 2023-24 chhungin zirlai 4,60,779 an awm a; kum 2022-23 khan zirlai naupang 82,162 awmin, kum ruk chhunga an tam ber ṭum a ni.