Khingpuite hneh ber Dr Vanlalthlana; Inhnehna hniam ber K Laldawngliana

Mizoram Assembly inthlanpui neih zawh takah mahni khingpuite hneh chiang ber chu Aizawl North-II biala thlan tlin Dr Vanlalthlana a ni a, tling zinga tlinna hniam ber chu Tuirial biala thlan tlin K Laldawngliana a ni thung.

Election Commission of India (ECI)-in vote hmuh zat a tarlan aṭanga a lan danin, Aizawl North-II biala ZPM candidate Dr Vanlalthlana chuan vote 11,040 hmuin, amah hnaih bertu MNF candidate Vanlalsawma chu vote 6,507-in a hneh a, inhnehna sang ber a ni.

Inhnehna sang ber dawttu chu Aizawl North-I bialah niin, vote 10,772 hmutu ZPM Vanlalhlana'n amah hnaih bertu MNF candidate R Lalzir­liana chu vote 5,485-in a hneh a; pathumna chu Aizawl West-II biala ZPM candidate Lalnghinglova Hmar a ni a, vote 10,398 hmuin, amah hnaih bertu Lalruatkima (MNF) chu vote 4,819-in a hneh.

Inhnehna hniamna ber chu Tuirial bialah a ni a, vote 6,610 hmutu MNF candidate K Laldawngliana'n amah hnaih bertu ZPM candidate Laltlanmawia chu vote 13 chiahin a hneh. Pahnihna chu Lengteng biala ZPM candidate F Rodingliana niin, vote 6,171 a hmuh chu MNF candidate Dr L Thangmawia'n vote 47-in a pha lo. Pathumna chu Thoráng biala MNF candidate R Rohmingliana a ni a, vote 4,141 hmuin, amah hnaih bertu INC candidate Zodintluanga Ralte chu vote 62 chiahin a hneh bawk.

Dinna biala vote tla zawng zawng aṭanga chhûta vote hmu sang ber chu Aizawl West-II biala thlan tlin Lalnghinglova Hmar a ni a, vote thla 17,640 zinga vote 10,398 a hmu a, 58.95% a tling a, amah hnaih bertu MNF candidate Lalruatkima'n vote (5,579) 31.63% a hmu.

Vote share tam lamah hian Aizawl North-II biala thlan tlin Dr Vanlalthlana, ZPM chu 55.94% a ni a, Aizawl North-I biala thlan tlin Vanlalhlana, ZPM chu 51.27% niin pathumna a ni.

MLA atana thlan tlin zinga mahni dinna biala vote share hniam ber chu Hachhek biala thlan tlin MNF candidate Robert Romawia Royte niin, vote tla 17,598 zinga 5,705 a hmu a, chu chu 32.42% chiah a ni a; amah hnaih bertu ZPM candidate KJ Lalbiakngheta vote share chu 30.68% a ni.

Thlan tlin zinga mahni biala vote share hniam ber dawttu chu Mamit biala MNF candidate H Lalzirliana niin, vote 7,167 a hmu a, vote tla 20,537 aṭangin 34.9% a ni. Pathumna Lalrintluanga Sailo, Dampa biala MNF candidate vote share chu 35.65% chiah a ni bawk.

Vote hmuh zat tam lamah Tuichawng biala thlan tlin Rasik Mohan Chakma, MNF chu pakhatna niin, vote 13,346 a hmu a; vote 11,872 hmutu Aizawl West-I biala ZPM candidate TBC Lalvenchhunga leh vote 11,296 hmutu Lawngtlai West-a INC candidate C Ngunlianchunga ten an dawt.

Thlan tlin zinga vote hmu tlem ber chu Thorang biala MNF candidate R Rohmingliana niin, vote 4,141 a hmu a; a dawttu chu Lunglei West-a ZPM candidate T Lalhlimpuia niin, a hmuh zat chu 5,029 a ni a, pathumna chu South Tuipuia ZPM candidate Jeje Lalpekhlua niin, vote 5,468 a hmu a ni.